എന്റെ ചിത്രങ്ങള്‍

പണി കിട്ടി

2011-10-07T12:24:00.000-07:00

പിള്ളേരു കൂടി ഒരിടത്തിരുന്ന് അവന്മാരുടെ കാര്യം നോക്കുകയായിരുന്നു. ജീവഭയമോ മാനഭയമോ ഉള്ളവരു നാലടി മാറി പോകുകയേ ഉള്ളൂ.അപ്പഴാണു “ചന്തുവിനെ തോൽ‌പ്പിക്കാനാകില്ല മക്കളേ, ചന്തു ജർമനിയിൽ മലയിൽ വണ്ടിയോടിച്ചിട്ടുണ്ട് ഒമാനിൽ കുളത്തിൽ വണ്ടിയോടിച്ചിട്ടുണ്ട്” എന്നൊക്കെ വീരവാദവുമായി ഒരു ഹതഭാഗ്യൻ ചെന്ന് കൊമ്പ് കോർത്തത്.

ദോഷം പറയരുതല്ലോ, ഇമ്മാതിരി തോൽ‌വി കാണാൻ കഴിയുന്നത് ഒരു ഭാഗ്യമാണ്. പിള്ളേരു ഇയാളെ വലിച്ചു കീറി പാളത്താറ് ഉടുത്തുകളഞ്ഞു.

പാവം പാക്കു

2011-09-25T13:43:00.000-07:00

വയസ്സായി പതേരി കയറിയ ഒരു പാവം പാക്കു. നല്ല സ്നേഹമുണ്ട്, സ്വൽ‌പ്പ സ്ലോ ആണെങ്കിലും വിളിച്ചാൽ അടുത്ത് വരും

ക്ലൌൻ ഫിഷ്

2011-09-16T14:37:00.000-07:00

വിഷ കന്യകേടെ ഒരു ചുംബനം..... ഒരു മധി ചുംബമൻ....

നാഗം

2011-08-16T15:46:00.000-07:00

തുറന്നാൽ ഈ സർപ്പം പുറത്തു ചാടും. അടഞ്ഞാൽ ആ രത്നങ്ങൾ ഇരുട്ടിലാകും.

എറങ്ങിയെടേ!

2011-08-15T04:56:00.000-07:00

എഴുപത് എഴുപതിൽ നിന്ന് അറുപത്തൊമ്പത് എഴുപത്തൊന്നിലേക്ക്.

കായൽ ഞണ്ട്

2011-08-04T09:47:00.000-07:00

മോൺസ്റ്റർ

അതാ ഓടിക്കളഞ്ഞു, നില്ലെടാ!

ഉവ്വേ, നീ ആരു കിങ്ങ് കോങ്ങോ?

നമ്മളോടാ കളി!

പൂവ് ഇവന്റ്

2011-04-29T13:55:00.000-07:00

പൂവ് ഇവന്റിലേക്ക് അയക്കാൻ എന്റെ കയ്യിൽ പൂവൊന്നും ഇല്ല, അതുകൊണ്ട് ഒരു പൂവാലന്റെ ആസനം ഇടുന്നു.
മോഡൽ- എന്റെ ഒറാൻഡ. മോഡൽ റിലീസ് ഫോം വാങ്ങിച്ചിട്ടില്ല. സംഗതി പറഞ്ഞാൽ ചിലപ്പോ അവൻ പള്ള് വിളിച്ചേക്കും,

സന്ധി

2011-04-23T12:58:00.000-07:00

സെൽഫ് എടുത്തത്. എന്റെ സ്വന്തം സന്ധി

നേരേ വാ

2011-04-22T01:06:00.000-07:00

പണ്ട് ഡിസ്കസിന്റെ ഒരു പടം ഇട്ടപ്പോള്‍ സൂരജ് ഇവര്‍ നേരേ വന്നാല്‍ വരയായി പോകും എന്ന് നിരീക്ഷിക്കുകയും അങ്ങനെ ഒരു പോസ് സങ്കല്പ്പിക്കാന്‍ പറ്റുന്നില്ല എന്ന് രശ്മി വാവ പറയുകയും ചെയ്തിരുന്നു. അന്നേ ഞാന്‍ വിചാരിച്ചിരുന്നതാ ഡിസ്കസിനെ ക്യാമറയ്ക്ക് നേരേ നിര്‍ത്തി ഒരു പടം എടുക്കണം എന്ന്.

[ചില്ലിലെ അഴുക്ക് കണ്ടില്ലെന്നു വയ്ക്കുക. ഒരു ആല്‍ഗേ ബ്ലൂം ആണ്‌ ഇപ്പോ ഇവരുടെ വീട്ടില്‍. ഭിത്തി മുഴുവന്‍ ആല്‍ഗേ പറ്റിയിരിക്കുന്നു. ഒന്ന് വൈപ്പ് ചെയ്യണം.]

ഒന്ന്: ഇത് സൈഡ് പോസ്. ഡിസ്കസിന്റെ വരയും കുറിയും നിറവും കിട്ടാന്‍ ഇങ്ങനെയാണ്‌ പടം എടുക്കുക

താഴെക്കാണുന്നത് മുഖാമുഖം. പൂര്‍ണ്ണമായും നേരേ ആക്കിയില്ല, ആക്കിയാല്‍ ഇതിലും കഷ്ടമാവും കാര്യം.

സമര്‍പ്പണം: ഫ്രണ്ട് പോസ് എടുക്കാന്‍ കാരണക്കാരായ സൂരജിനും രശ്മിക്കും. പിന്നെ ഇന്നലെ മീന്‍ പിടിച്ചിട്ട സപ്തന്‌. ഇന്ന് മീന്‍ പിടിക്കാന്‍ പോയിരിക്കുന്ന അരവിക്ക്.

മൂണി

2011-04-21T08:29:00.000-07:00

ഡാബറിലോട്ട്... അല്ല ടർബനിലോട്ട്... മീൻ പടം പിടിക്കാൻ പോയിരിക്കുന്ന മൊത്തം ചില്ലറയ്ക്ക് ഇരിക്കട്ട്. എന്റെ സ്വന്തം ടാങ്കിലെ സ്വന്തം മൂണി.

ഇവന്റ്-ലൈബ്രറി

2011-04-17T14:24:00.000-07:00

ഇത് ലൈബ്രറി ഹെഡോഫീസ്

ഇത് ഓപ്സ് ലൈബ്ബ്രറി- കാര്യമായി ഒന്നുമില്ല.

ഇത് ഒരുകാലത്ത് ഐ ടി ലൈബ്രറി ആയിരുന്നു. ബുക്കൊക്കെ ദാനം ചെയ്തു. ബാക്കി വന്ന സ്ഥലത്ത് ദത്തൻ കുടിയേറി.

ഇത് ലൈബ്ബ്രറി ബെഡ് റൂം ബ്രാഞ്ച്- ഇതിലു ഞാൻ വായിക്കുന്ന ഒന്നും ഇല്ലെന്ന് കണ്ടാൽ തന്നെ അറിയുമല്ലോ ഈയിടെ ഒന്നും വായിക്കാറില്ലെന്ന്.

ബ്ലോഗറ്

2011-04-17T05:45:00.000-07:00

വെറുതേ... ദുബായ് അക്വേറിയത്തില്‍-3

2011-04-17T00:01:00.000-07:00

ഛായ്! ആ പെമ്പ്രന്നോര്‍ ഇന്നും കഴിക്കാന്‍ കൊണ്ടുവരുന്നത് കണവാ മുറിച്ചതാണല്ലോ. ഇവര്‍ക്ക് വേറൊന്നും കിട്ടൂല്ലേ?

എന്റെ പട്ടി തിന്നും ഇത്!

ഒരു പാന്തര്‍ പഫര്‍ (Takifugu pardalis ) . കൊടിയ വിഷമുള്ള ഒരു പഫര്‍ മത്സ്യമാണിത്. രസകരമായ വസ്തുത ഇവയ്ക്ക് വിഷ ഗ്രന്ഥികള്‍ ഇല്ല എന്നതാണ്‌. വിഷമുള്ള ബാക്റ്റീരിയയെ കണ്ടെത്തി, അതിനെ തിന്ന് വയറ്റില്‍ അവയെ വളര്‍ത്തുകയാണ്‌ ടാകിഫുഗുകള്‍ ചെയ്യുന്നത്. സയനൈഡിന്റെ ആയിരം മടങ്ങ് വീര്യമുള്ള വിഷമാണത്രേ അവ ഉത്പാദിപ്പിക്കുന്നത്. മറ്റു ജന്തുക്കള്‍ പിടിച്ചു തിന്നാന്‍ വന്നാല്‍ ഇവന്‍ സാധാരണ പഫറുകളെപ്പോലെ ശരീരം വീര്‍പ്പിച്ച് വിഴുങ്ങാന്‍ പറ്റാത്ത അവസ്ഥയാക്കും. എന്നിട്ടും തിന്നാല്‍ തിന്നവന്റെ കട്ട പൊഹ.

കുടലില്‍ വിഷവുമായി നടക്കുന്ന ഇവന്‍ ഒരുത്തനെ കറിവച്ചു കഴിച്ചാല്‍ ക്ഷണം പരലോകം കാണാം.

ദുബായ് അക്വേറിയത്തില്‍ ഇവന്റെ വിവരം ഒന്നും കൊടുത്തിട്ടില്ല. ഇത്ര പ്രത്യേകത ഉള്ള മീനാണിതെന്നും ഒരു ബോര്‍ഡ് വയ്ക്കണമെന്നും പറഞ്ഞിട്ടു പോന്നു.

[ചിത്രത്തിലെ അടിക്കുറിപ്പുകള്‍ തമാശയ്ക്ക് കൊടുത്തതാണ്‌. ആദ്യത്തെ ചിത്രത്തില്‍ ഫിഷിന്റെ ശ്രദ്ധ എന്റെ ക്യാമറയിലാണ്‌. രണ്ടാമത്തെ ചിത്രത്തില്‍ ഫീഡിങ്ങ് ക്യൂ ടാങ്കില്‍ ഇട്ടപ്പോള്‍ അവന്‍ ഒന്നു ശങ്കിച്ച് മാറിയതാണ്‌, ഉടനേ തന്നെ വന്ന് തീറ്റയടിച്ച് താങ്ക്സ് പറഞ്ഞു പോകുകയും ചെയ്തു]

വെറുതേ... ദുബായ് അക്വേറിയത്തില്‍ -2

2011-04-16T02:27:00.000-07:00

ഞാന്‍ കടിക്ക്വൊന്നുമില്ല, കൈ വെള്ളത്തിലിട്ട് നോക്കിക്കേ- പിരാന

അറാപൈമ - ജീവിക്കുന്ന ഫോസില്‍ എന്നു വിളിക്കാറുണ്ടിതിനെ. ശുദ്ധജലത്തിലെ ഏറ്റവും വലിയ മീനുകളിലൊന്ന്. കൂടെ കളിക്കുന്നത് പാക്കു.

വൈറും കയ്യും വീശി ഇങ്ങു പോന്നോ? തിന്നാനൊന്നും കൊണ്ടുവന്നില്ലേടേ? - ഒരു കൂട്ടം പാരട്ട് സിക്ലിഡുകള്‍.

വയോവൃദ്ധനായ ഒരു അരോവാന

മൂറിഷ് ഐഡല്‍ ആണെന്നു കരുതി ക്ലിക്കി പോന്നതാണ്. വീട്ടില്‍ വന്നു പടം ഡൗണ്‍ലോഡിയപ്പ മനസ്സിലായി അത് ഒരു ബട്ടര്‍ഫ്ലൈ ഫിഷ് ആയിരുന്നു.

ലയണ്‍ ഫിഷ് - ആളു വിഷമാണ്‌

ക്ലൗണ്‍ ഫിഷ്

വെറുതേ...ദുബായ് അക്വേറിയത്തില്‍-1

2011-04-16T02:03:00.000-07:00

അണ്ടര്‍ വാട്ടര്‍ ടണല്‍ പുറവശം

ടണല്‍ വാക്ക്

ഒരു ഷവല്‍ നോസ് ഗിത്താര്‍ഫിഷ് . മൂപ്പര്‍ക്ക് കണ്ണ് മോളില്‍ ആയിരുന്നതുകൊണ്ട് നിലത്തു കിടന്നിട്ടും എന്നെ കണ്ടു. പരിചിതമായ ഒരു മുഖം.

ദേവനോ? കൊറച്ച് ദിവസം കണ്ടില്ലല്ലോ എന്ന് നെരുവിച്ചതേയുള്ളൂ.

സൂങ്ങളു തന്യേ?

ഇപ്പഴേലും വന്നല്ല്. സന്തോഷായി ദേവാ.

എന്നായിരുന്നു നീ ലാസ്റ്റ് വന്നത്? മറന്നു പോയല്ലോ.

സ്റ്റിങ്ങ് റേയ്ക്കും നമ്മളെ ഓര്‍മ്മയുണ്ട്!

ഒരുത്തന്‍ വന്നെന്നും പറഞ്ഞ് എല്ലാം ദാ ചിരിച്ചോണ്ട് ചെല്ലുന്നു. അവന്‍ വെറും ദേവനല്ലേ, കാമദേവനൊന്നും അല്ലല്ല്? എന്റെ പട്ടി ചിരിക്കും.

ഒരിറ്റു വെളിച്ചം

2011-04-10T15:01:00.000-07:00

പ്രതീക്ഷയുടെ നാളം ചുവപ്പിനുള്ളിലാണ്.

കുത്തിക്കോ പക്ഷേ നാറ്റരുത്

2011-04-10T14:53:00.000-07:00

ലെൻസ് തരക്കേടില്ല, വാങ്ങിക്കാൻ തീരുമാനിച്ചു.ഒരു പെട്ടി പല്ലുകുത്തിയുടെ മാക്രോ.

കുഞ്ഞിക്കുരു

2011-04-10T10:47:00.000-07:00

എലക്ഷന്റെ ടെൻഷനുമായി കറങ്ങിത്തിരിയുന്നവരു ഇങ്ങോട്ടു വരീനെന്നേ, നമുക്കു പല്ലാങ്കുഴി കളിക്കാം.

ഹൂപ്പോ ഇറോ ഇറോ.

2011-04-08T13:12:00.000-07:00

അതായത്, മഞ്ജിത്തും ഈയെടെയായി പാഞ്ചാലീം ഒക്കെ കൊറേ കിളിപ്പടങ്ങള്‍ തന്നിട്ടുണ്ട്. മര്യാദേടെ പേരില്‍ തിരിച്ച് എന്തെങ്കിലും കൊടുക്കണ്ടേ? വേണം. രാവിലേ എഴിച്ച് ചായ കുടിച്ച് ഇരുന്നപ്പഴാണ്‌ അങ്ങനെ ഒരു വെളിവുകേട് ഉണ്ടായത്.

സബീല്‍ പാലസില്‍ പോയി മയില്‍ പീലി‌പ്പോസ് മാപ്പിളയായി നില്‍ക്കുന്ന പടം പിടിച്ചാലോ? ച്ഛായ്, ഇന്തേന്നു വന്നവരെ ദുബായിലെ മയിലിനെ കാണിക്കാനോ. റാസല്‍‌ഖോറില്‍ പോയി ഫ്ലമിംഗോകള്‍ നൂറുകണക്കിനു കൂനിപ്പിടിച്ച് നില്‍ക്കണ പടം? നല്ല കളര്‍ഫുള്‍ ആയിരിക്കും, പക്ഷേ ഫ്ലാമിംഗോകള്‍ ഇവിടത്തെ താമസക്കാര്‍ ആണെങ്കിലും വരത്തന്മാര്‍ അല്ലേ? തദ്ദേശീയമായ അറബിക്കിളി വേണം. ഐഡിയ.

കൈപ്പള്ളിയെ വിളിച്ചു.

"ഡേയ്, ഹൂപ്പോ.."

"പുതിയ പള്ള് ആണോ, ഞാങ്ങ് ക്യാട്ടിട്ടില്ലല്ല്."

"അതല്ല ഒരു ഹുപ്പോയുടെ ഫോട്ടോ പിടിക്കണം. ഇഞ്ഞോട്ട് വാ"

യെത്തി.

യെന്തുകൊണ്ട് ഹൂപ്പോ?
പല കാരണം. ഒന്നാമത് ഇവടെയൊക്കെ ഉള്ളവന്‍ ആണ്‌. രണ്ടാമത് പുല്ലില്‍ കുത്തിയിരിക്കുന്നവന്‍ ആണ്‌, അയിനെ തിരക്കി മരത്തിന്റെ മണ്ടേല്‍ ഒന്നും കേറണ്ടാ. പിന്നെ, ഇവിടങ്ങളില്‍ ഇഷ്ടമ്പോലെ ഉണ്ട്, സോ കണ്ടുകിട്ടാന്‍ സാധ്യത കൂടുതല്‍.

എന്നാ വാ സബീല്‍ പാര്‍ക്കില്‍ പോയി നോക്കാം.
പാര്‍ക്ക് എന്നു കേട്ടത്തും പിള്ളേര്‍ പാഞ്ഞു വണ്ടീല്‍ കേറി. രണ്ട് പന്തും രണ്ട് ഫ്രിസ്ബീയും ഒക്കെ എടുത്ത്. അതായത് നിലത്തിരിക്കണ കിളിയെ പന്തു തട്ടിയാല്‍ ഓടിക്കാം. മരത്തേല്‍ ഇരിക്കുന്നവരെ ഓടിക്കണേല്‍ ഫ്രിസ്ബീ തന്നെ വേണം. ഇവന്മാരടെ കയ്യില്‍ ഓലപ്പടക്കം ഇല്ലാത്തത് ഭാഗ്യം, അല്ലേല്‍ പക്ഷി നിരീക്ഷണത്തിനു അതും കൊണ്ട് വന്നേനെ.

യാന്ത്രികമായ പരിമിതികള്‍. ടെലിഫോട്ടോയ്ക്ക് എന്റെ കയ്യില്‍ ഒരു സിഗ്മ സെവന്റി ത്രീഹന്‍ഡ്രഡ് പിള്ളേരുകളി ലെന്‍സ് മാത്രമേയുള്ളൂ. അതിന്റെ മോട്ടോറു ക്ലച്ച് പിടിക്കുന്നത് കണ്ടാല്‍ കിളി വിഷമിച്ച് അടുത്തു വന്നു നിന്നു തരും. ഒള്ളതെടുത്തു. സബീല്‍ പാര്‍ക്കില്‍ ചെന്നു. അപ്പഴാണ്‌ ഓര്‍ത്തത്, ട്രൈപ്പോഡ് എടുക്കാന്‍ മറന്നു.

കത്തിയില്ലാതാണോടേ ചെരയ്ക്കാന്‍ വരുന്നത് എന്ന് കൈപ്പള്ളി.

കത്തിയുണ്ട്, ബ്രഷ് ആണ്‌ ഇല്ലാത്തത്, നമ്മക്ക് കൈകൊണ്ട് ഷേവിങ്ങ് ക്രീം വാരിത്തേക്കാം, വാടേ.
അനന്തതയില്‍ ഒരു മരത്തണല്‍, അവിടെ ഒരു കിളി. അങ്ങുവരെ എന്റെ ലെന്‍സ് ചെല്ലത്തില്ല. എന്തരാണോ, എന്തായാലും ഹൂപ്പോയല്ല.

മായേം ദത്തനും സുഹൈലും പാഞ്ഞു കയറിയത് ദിങ്ങനെ. കിളികള്‍ പ്രാണനും കൊണ്ട് പാഞ്ഞു.

പിള്ളേരെ ഭീഷണിപ്പെടുത്തി ഇരുത്തീട്ട് പടം പിടിക്കാം എന്നു വച്ച് നാലുപാടും നോക്കിയപ്പോ കണ്ടത് ക്രിക്കറ്റ് വേള്‍ഡ് കപ്പ് ഫീവര്‍ കേറിയ പിള്ളേര്‍ പാര്‍ക്ക് കൈയ്യേറിയതാണ്‌. ഹൂപ്പോ പോയിട്ട് ഒരു ഈച്ച പോലും നിലത്തിരിക്കുന്നത് കാണാനൊക്കില്ല.

അതാ ഗഗന നീലിമയില്‍ ഒരു പക്ഷി. മലര്‍ന്നു നിന്നു ക്ലിക്കി.

ഡിസാസ്റ്റര്‍. ലെന്‍സ് ഫ്ലെയര്‍, യു വി, ഡേലൈറ്റ് കോമ്പന്‍സേറ്റ് ചെയ്തില്ല. യുവിക്ക് ഫില്‍ട്ടറിട്ടു. എക്സ്പോഷര്‍ അഡ്ജസ്റ്റ് ചെയ്തു. ഫോക്കസ് സിംഗിള്‍ പോയിന്റിലാക്കി. പറന്നുപോകുന്ന അടുത്ത സുനായില്‍ ക്ലിക്കി.

ആശ്വാസം, കളര്‍ ശരിയായി, പക്ഷേ, പക്ഷി പോലീസിന്റെ ചോപ്പര്‍ ആയിരുന്നു.
"ലോണ്ടെ ഒരു പ്രാവ്" കൈപ്പള്ളി പറഞ്ഞു.

ഞാനിനി പ്രാവിന്റെ പടം ഇട്ടാല്‍ എനിക്കടി കിട്ടും, ഇതുവരെ ഇട്ടതെല്ലാം പ്രാവാണ്‌.

"അത് mourning dove അല്ലേ, ഇത് laughing dove . ക്ലിക്കെടേ."

നിനച്ചിരിക്കാതെ പ്രാപ്പിടയുടെ പൂവന്‍ പറന്നു കേറി. ഒറ്റ ക്ലിക്ക്, പക്ഷേ ക്യാമറ സിംഗിള്‍ പോയിന്റില്‍ ഫോക്കസ് ചെയ്തതുകാരണം പൂവാലന്‍ തെളിഞ്ഞില്ല. പോയ ഷോട്ട് ആന പിടിച്ചാലും വരൂല്ല.

അവനും അവളും അവിടിരുന്ന് ലാഫിങ്ങും ഡാന്‍സും നടത്തട്ട്, വിട്ടേക്കാം.

ബുര്‍ജ് ദുബായിയുടെ പൊക്കമുള്ള മരത്തിന്റെ മണ്ടയ്ക്ക് എന്തരോ ഇരിക്കുന്നു. ചിലപ്പ ഹൂപ്പോയാണെങ്കിലോ ആഞ്ഞു സൂമി. ചില്ലകള്‍ ചിലന്തിവലപോലെ. ഹൂപ്പോ അല്ലെന്നു മാത്രമല്ല പ്രോഗ്രാം തെറ്റിയും പോയി.

ഒന്നൂടെ.

അപ്പ മരം മറഞ്ഞാലും നമ്മക്ക് കിളി കിട്ടും. എന്നാല്‍ അടുത്തതിനെ പിടിക്കാം.

"ലോ ഒയരെ ഒര്‌ ഹൂപ്പോ" കൈപ്പള്ളി പറഞ്ഞു.

ഒയരെ എന്നു വച്ചാല്‍ അതിന്റെ അടുത്താണ്‌ ചൊവ്വാ ഗ്രഹം, അത്ര ഉയരത്തില്‍. മുന്നൂറേ സൂം ചെയ്തിട്ടും കിളി ദൂരെ. കൈ വിറയലോട് വിറ, എന്തരോ വരട്ട്. ഹൂപ്പോയെ കിട്ടി.

മതി ഫോട്ടോ, വാ കളിക്കാം. ദത്തന്‍ ഒരേ ബഹളം. ഹൂപോയ്ക്ക് ബൈ പറഞ്ഞ് അവന്റൂടെ കളിക്കാന്‍ പോയി.

കിളി പിടുത്തം മിനക്കെട്ട എടവാട് ആണെന്ന് മനസ്സിലായി. ഓരോ ദിവസവും ഓരോ കിളിയുടെ പടം ഇടുന്ന നിങ്ങള്‍ ഡെയിലി എത്ര മണിക്കൂര്‍ പടം എടുക്കും എന്നാലോചിച്ചിട്ട്... ഹും. ഒരു ദിവസം ഞാനും ഇടും അതുപോലത്തെ പടം.

ഇവന്റ്- കണ്ണാടി

2011-04-08T03:50:00.000-07:00

രമണനെ ഇറക്കുന്നു. കൂളിങ്ങ് ഗ്ലാസ്സ്, തൊപ്പി, വള്ളിക്കളസം, ചെരിപ്പ്, ആട്ടിന്റെ താടി, ബെഞ്ച്, ഗാർഡൻ ചെയർ, തഴപ്പായ, പിള്ളേരു കൂടി തലയ്ക്കിട്ടു ഞൊട്ടൽ, ഐപ്പാഡ് എന്നീ ഇവന്റുകളിൽ കൊള്ളിക്കാം.

ആ‍ദരാഞ്ജലികൾ

2011-03-22T13:55:00.000-07:00

ശ്രീമാനാണോ ശ്രീമതി ആണോ എന്നറിയില്ല, ഇത് മാർബിൾ ഏഞ്ചൽ. അഞ്ചു മുതൽ എട്ടു വർഷം വരെയൊക്കെ ആയുസ്സ് വേണ്ടതാണ്. എന്താന്നറിയില്ല, നാലഞ്ചു വയസ്സിൽ വാർദ്ധക്യസഹജമായ പ്രശ്നങ്ങൾ കാട്ടിത്തുടങ്ങി. പത്തു മിനുട്ട് മുന്നേ മരിച്ചു.

ക‌മ്യൂണിറ്റി ടാങ്കിൽ ഇത് ഒരു കാരണവർ ആയിരുന്നു. ആരും ഫൈറ്റ് ചെയ്യില്ല, ആരും ചേസും ചെയ്യില്ല. ആരോടും വഴക്കില്ല. ബ്രഹ്മചാരി ആയിരുന്നെന്ന് തോന്നുന്നു, പെയർ ചെയ്യാനോ മേറ്റ് ചെയ്യാനോ ഒരു താൽ‌പ്പര്യവും കാണിച്ചില്ല. സാധാരണ ഏഞ്ചലിനെക്കാൾ വലിപ്പമുണ്ടായിരുന്നു, ആക്റ്റീവും ആയിരുന്നു. പേൾ ഏഞ്ചലുകൾക്കും മൂണികൾക്കും ഇടയിൽ ഒരു ഷോ ഓഫും ഇല്ലാതെ കഴിഞ്ഞ ഇതിനെ സന്ദർശകർ അങ്ങനെ ശ്രദ്ധിക്കാറില്ലായിരുന്നു. അതിൽ അതിനു യാതൊരു പരാതിയും ഇല്ലായിരുന്നു. സ്ട്രെസ്സ് അതിനു പുല്ലായിരുന്നു. വെക്കേഷൻ ഫീഡ് നാശത്തിലെത്തി പലരും ക്യാനിബാളിസം വരെ പോയപ്പോൾ പട്ടിണി ഓപ്റ്റ് ചെയ്ത മീനാണ്. ആയുസ്സെത്തിയാൽ പോകാതെ പറ്റില്ലല്ലോ.

കാഡവർ ഫീഡ് ചെയ്യുന്നവർ വരെയുള്ള ടാങ്കാണ്. ഇതിന്റെ ജഡം വീണിട്ട് ഒരുത്തൻ പോലും തൊട്ടില്ല. അവരെല്ലാം കൂടി ഇതിനു ചുറ്റും നിൽക്കുന്നു, ഒരു ചടങ്ങ് നടത്തുമ്പോലെ.

ഇവന്റ്- തേള്‍

2011-03-12T22:31:00.001-08:00

എന്തെല്ലാം ഇവന്റാണോ എന്തോ. എന്തരോ വരട്ട്, ദാണ്ട് അഗ്രജാ എന്റെ തേള്‍.

ഇവന്റ്- തോണി

2011-03-11T22:46:00.000-08:00

കുളവാഴ ഇവന്റ് വരുന്നുണ്ടെങ്കില്‍ അതിനും കൂടി ഇതു മതി

ഇവന്റ്: മുറീം കിടക്കേം

2011-03-08T13:01:00.000-08:00

ഇവന്റ്: മുറീം കട്ടിലും. സോറി , ബെഡ് റൂം പടം ഇടാൻ പറ്റൂല്ല. അതോണ്ട് വേറൊരു മുറീലെ കിടക്ക (ബെഡ് റൂമിൽ അല്ലാതെ കിടക്ക എങ്ങനെ വന്നെന്നു ചോദിക്കല്ലേ, അങ്ങനെയും സംഭവിക്കാറുണ്ട്)

Cosider the Pros and Cons

2011-03-04T23:56:00.001-08:00

ഇവന്റ്- ഇന്നത്തെ ഉച്ചഭക്ഷണം

2011-02-28T04:45:00.000-08:00

കുമാറിന്റെ ഇന്നത്തെ ലഞ്ച് ഇവന്റിലേക്ക്:

ചോറ്, പുളിശ്ശേരി, ഉരുളക്കിഴങ്ങ് മെഴുക്കുപുരട്ടി, പിഞ്ച് പടവലം തോരൻ, നെയ്മീൻ പിക്കിൾ .

ശ്രീലങ്കൻ നൃത്തം

2011-02-26T12:31:00.000-08:00

ശ്രീലങ്കൻ ഡാൻസിനെപ്പറ്റി വലിയ ധാരണ ഇല്ല. കണ്ടിടത്തോളം വിവിധ ക്ലാസിക്കൽ ഡാൻസുകൾ ചേർത്ത ഫ്യൂഷൻ ആണെന്നാണ് തിരിഞ്ഞത്.

വളയാദി ഇവന്റ്

2011-02-26T03:04:00.000-08:00

ഇവന്റിലോട്ട്, വള, തള, മാല,കമ്മൽ`, നെറ്റിച്ചുട്ടി.

സെല്ലുലൈറ്റ് സംഹാരിണിച്ചായ

2011-02-25T13:08:00.000-08:00

ചായ കുടിക്കൂ സെല്ലുലൈറ്റ്സ് കുറയ്ക്കൂ.

ജൈവശില്പം

2010-12-20T01:25:00.001-08:00

പ്രതിഫലനം

2010-12-17T08:51:00.000-08:00

പ്രതിഫലനം എടുക്കാൻ ശ്രമിച്ചതാണ്. എന്തു ചെയ്യാം, പ്രതിഫലനം നന്നായിരുന്നെങ്കിലും ഫോട്ടോ നന്നായില്ല. എന്തരോ വരട്ട് പത്തു മിനുട്ട് കഷ്ടപ്പെട്ടതാണ്, ഇവിടെക്കിട.

ജന്മദിനാശംസകൾ

2010-12-15T11:06:00.000-08:00

സുഹൈൽ കൈപ്പള്ളിക്ക് ജന്മദിനാശംസകൾ

അസ്തമയം

2010-12-13T12:17:00.000-08:00

ഒരു ദെവസമെങ്കിൽ ഒരു ദെവസം. നാട്ടിൽ പോയാൽ പെരുമണിലെ അസ്തമയം കാണണം, ഒരു ശീലമാ.

പടം എടുക്കാൻ നിന്ന സ്പോട്ടിലെ പൊല്യൂഷം. ഏതോ ശുനകസുതന്മാർ പിക്ൿനിക്കിനു വന്നിട്ട് കായലിൽ തട്ടിയിട്ട് പോയി ഇതൊക്കെ.

ഈ അഗ‌മ്യഗാമികൾ ഇതെന്തോന്നാ തിന്നത്, പാത്രത്തിനു ചുറ്റി ഒരണലി ചത്തു കിടക്കുന്നല്ലോ :(

ഹാപ്പി ബെർത്ത് ഡേ

2010-11-25T12:57:00.000-08:00

ഡോറക്കുട്ടീടെ ഹാപ്പി ബെർത്ത് ഡേ.

വെയില്‍

2010-11-21T02:22:00.000-08:00

പാര്‍ക്കില്‍ പോയ വഴി കണ്ടതാണ്‌ അനില്‍ശ്രീയുടെ മകനെ. പേരു ചോദിക്കാന്‍ വിട്ടുപോയി.

നോർമൽ വ്യൂ & സ്രാങ്ക് വ്യൂ

2010-11-20T11:00:00.000-08:00

ലിങ്ങനെയാണ്. സ്രാങ്കിഫൈ ചെയ്ത ആകാശത്ത് മേഘമില്ലെന്ന കുതിരവട്ടന്റെ പരാതിയും മാറട്ട്.

ദാ പ്രാവ്

2010-11-19T12:30:00.000-08:00

മൻ‌ജിത്തിന് സമർപ്പിക്കാനായിട്ട് മരുഭൂമീൽ പോയിട്ട് ഒരു ഹൂബുറയോ റാസൽഖോറിൽ പോയിട്ട് ഒരു ഫ്ലമിംഗോയോ കുറഞ്ഞത് വീട്ടിനു മുന്നിലെ പുൽത്തകിടീൽ പോയിട്ട് ഒരു ഉപ്പുപ്പനെ എങ്കിൽ പിടിക്കണം എന്നു വിചാരിച്ചിട്ട് ഒന്നും നടന്നില്ല. ആകെ കിട്ടിയ പ്രാവ് ദാണ്ട്.

ടൈഗർ ഡ്രംസ്

2010-11-17T13:22:00.000-08:00

ടൈഗർ ഡ്രംസ് ക്ലാസ്സിക്കൽ മ്യൂസിക്കാണെന്ന് പറയുന്നു. അവരു എന്തോക്കെയോ വിശദീകരിച്ചു, എന്തരോന്തോ. അടിച്ചങ്ങോട്ട് പിരുത്തെന്ന് പറഞ്ഞാൽ കഴിഞ്ഞല്ലോ. എടമ്പിരി വലമ്പിരി തിരിഞ്ഞടിച്ചു. ഓതിരം കടകം പറഞ്ഞടിച്ചു. ആനത്തിരിപ്പു തിരിഞ്ഞടിച്ചു, പന്നിച്ചടക്കം മലർന്നടിച്ഛു... യെവരു ടൈഗറു തന്നെ.

സുഹൈല്‍

2010-11-16T22:56:00.000-08:00

കഴിഞ്ഞ പടം കണ്ട് തോനേ പേരു ലയാള്‌ ഉടുതുണിയില്ലാതെ കടാപ്പൊറത്ത് നില്‍ക്കണത് എന്തരിനെന്ന് ചോദിച്ചാരുന്ന്. ദിതാണു കാര്യം. സുഹൈല്‍ നീന്തലു പഠിക്കുന്നു.

Rear Photograph

2010-11-15T23:45:00.000-08:00

Rear photographs ഒരുപാടെണ്ണം ബസ്സില്‍ ഇട്ട പാഞ്ചാലിക്ക് ഇരിക്കട്ട് ഇത്.

മോഡല്‍: നിഷാദ് കൈപ്പള്ളി (ഒരു പഴേ മോഡല്‍)

സ്കൂളില്‍ പോയേ

2010-09-14T05:30:00.000-07:00

ഇന്നലെയേ സ്കൂളിന്റെ കാര്യം പറഞ്ഞിരുന്നു, എന്നിട്ടും ഉറങ്ങിയപ്പോള്‍ താമസിച്ചു പോയി. ഉറക്കം തൂങ്ങിത്തൂങ്ങി ആറു മണിക്ക് എഴുന്നേറ്റു (പ്ലേ സ്കൂളില്‍ പതിനൊന്നു മണിക്കു പോയാല്‍ മതിയായിരുന്നു). അച്ചയും അമ്മയും കൊണ്ട് ക്ലാസ്സില്‍ വിട്ടു. അച്ച അവിടെ ഇരുന്നു പേപ്പറില്‍ എഴുതി, ദത്ത അവിടെ ഇരുന്നു കളിച്ചു. പിന്നെ അച്ചയും അമ്മയും പോയി. ഉച്ചക്ക് എന്റെ ബസ്സ് എന്നെ വിളിക്കാതെ പോയത്രേ, അതിനിപ്പ എന്താ ഞാന്‍ മാത്രം ഒരു ബസ്സില്‍ വന്നു വീട്ടിലോട്ട് (ഞാനല്ല ഓടിച്ചത് കേട്ടോ, ഡ്രൈവറും കണ്ടക്റ്ററും ഉണ്ടായിരുന്നു). സ്കൂളില്‍ ബാസ്ക്റ്റ് ബാളും സ്വിമ്മിങ്ങും ഉണ്ടെന്ന് ഇന്റര്‍‌വ്യൂ സമയത്ത് ആന്റി എന്നോട് പറഞ്ഞിരുന്നു (സോറി ആന്റിയല്ല, മിസ്സ്) . പക്ഷേ ഇന്ന് ബാസ്കറ്റ് ബോളും ഇല്ലായിരുന്നു സ്വിമ്മിങ്ങും ഇല്ലായിരുന്നു. ചിലപ്പോള്‍ നാളെ ആയിരിക്കും, നല്ല മിസ്സ് ആണ് പറ്റിക്കുകയൊന്നും ഇല്ല.

Thank you

2009-07-01T12:55:00.001-07:00

പാഠം രണ്ട്- പുസ്പം

2009-03-27T11:20:00.000-07:00

പൂവിന്റെ പടം എടുക്കാന്‍ എളുപ്പമാണെന്ന് ഗുരുക്കന്മാര്‍ പറയുന്നു. എന്നാ മലമറിക്കാം എന്നു കരുതി ഇറങ്ങി. നട്ടപ്പറ വേനലില്‍ ഏതു പൂ കിട്ടാന്‍. ഒള്ളതില്‍ ക്ലിക്കി.

പണ്ടാരം പൂ കാറ്റില്‍ ഇളകുന്നോണ്ടാണോ എന്തോ ഫോക്കസ് ഷാര്‍പ്പ് ആയില്ല.

ആ യാത്രാമൊഴിയൊക്കെ ചെയ്യുന്ന പോലെ പിറകില്‍ ഇരുട്ടാക്കിയാല്‍ ചെലപ്പ ഭംഗിയായാലോ.

പൂച്ചപ്പഴത്തിന്റെ പൂവാ. ശരിക്ക് വിരിഞ്ഞില്ലേ?

ദാണ്ടേ കൊളത്തില്‍ കൊളവാഴ പൂത്ത് നില്‍ക്കുന്നു. ഈ ഗ്രീറ്റിങ്ങ്സ് കാര്‍ഡിലൊക്കെ വരുന്നപോലെ ഒരെണ്ണം? ങേ ഹേ.

എന്തു പൂവാണോ എന്തോ. നിറത്തില്‍ വലിയ കേമത്തമില്ല. ഇനി വിരിഞ്ഞ് കുറേ ദിവസം ആയോണ്ട് നരച്ചതാവോ?

പല്ലിമുട്ട

2009-03-13T21:58:00.000-07:00

വവ്വാലില്‍ നിന്നു പ്രചോദനമുള്‍ക്കൊണ്ട്‌ സോണാര്‍ കണ്ടുപിടിച്ചതുമുതല്‍ ഇന്നാളില്‍ ബോക്സര്‍ മീനിനെ അനുകരിച്‌ ബെന്‍സ്‌ കാര്‍ ഇറങ്ങിയതുവരെയുള്ള ബയോണിക്സ്‌ കഥകളൊക്കെ നമ്മള്‍ കേട്ടിരിക്കുന്നു.

ബ്ലാക്ക്‌ബെറിയുടെ കുരു [trackball] കാണുമ്പോള്‍ എനിക്ക്‌ പല്ലി പോട്ടില്‍ മുട്ടയിട്ടു വച്ചിരിക്കുന്നതാണ്‌ ഓര്‍മ്മവരുന്നത്‌. ഇതും ഇനി ബയോണിക്ക്‌ കണ്ടുപിടിത്തമാണോ ആവോ.

പാഠം ഒന്ന് - തറ

2009-03-13T10:01:00.000-07:00

പോസ്റ്റിന്റെ തലക്കെട്ടും ചിത്രത്തില്‍ കാണുന്നവരുമായി ബന്ധമുണ്ടെന്ന് ആരും തെറ്റിദ്ധരിക്കല്ലേ.

പോയിന്റും ഷൂട്ടും ചെയ്യുന്ന ക്യാമറ മാറി ഇപ്പ ഡയസ്‌ നോണ്‍ ഒക്കെ ചെയ്യാവുന്ന ക്യാമറ ഒരെണ്ണം വാങ്ങിച്ചു. എന്തരൊക്കെയാണ്‌ പരുവാടിയെന്ന് നോക്കി വരുന്നതേയുള്ളു. ഇത്‌ ഒന്നാം പാഠം. ആദ്യമായിട്ട്‌ ചുമ്മ ക്ലിക്കാതെ എന്തരൊക്കെയോ ചെയ്തിട്ടു ക്ലിക്കിയപ്പ കിട്ടിയത്‌.

ഗുരുക്കള്‍ അപ്പുവിനും കൈപ്പള്ളിക്കും സമര്‍പ്പിച്ചു.
മോഡലുകള്‍ സിദ്ധാര്‍ത്ഥന്‍, കൈപ്പള്ളി.

വൈശാഖന്‍ മാഷ്‌

2008-09-02T13:10:00.000-07:00

നാട്ടില്‍ കല്യാണം കൂടാന്‍ പോയവഴിയാണ്‌ വൈശാഖന്‍ മാഷെ കണ്ടത്‌.മാഷ്‌ ബൂലോഗരുടെ സുഖവിവരമൊക്കെ തിരക്കി.

മാഷും ഞാനും ഈ പടത്തില്‍ കാണുന്നതിലും സുന്ദരന്മാരാണു കേട്ടോ. പടം ക്ലിക്കിയ അചിന്ത്യക്ക്‌ സൌന്ദര്യബോധമോ ക്യാമറക്കണ്ണോ ഇല്ലാത്തതുകാരണം ഈ പരുവം ആയിപ്പോയതാണ്‌.

ഫാഷന്‍ പരേഡ്

2008-07-14T02:22:00.000-07:00

പെമ്പിള്ളേരു ബിക്കിനിയിട്ടു നില്‍ക്കുന്നതു കാണാന്‍ ഇരച്ചു കയറിയവര്‍ വന്നതുപോലെ പോയിക്കോളുക, ക്ഷൗരത്തിനു കൊട്ടാന്‍ എന്നെക്കൊണ്ടാവില്ല (കട. വീക്കേയെന്‍)

ഇത് വീട്ടുമുറ്റത്തെ റീയാലിറ്റി ഷോ. ജഡജസ് & ജഡേജാസ്, പ്ലീസ് ടേക്ക് യുവര്‍ സീറ്റ്സ്. .

ആദ്യമായി മിസ് വെള്ളക്കാരി പട്ടത്തിനുള്ള മത്സരാര്‍ത്ഥികള്‍ :

1. മിസ്സ് വെള്ളമന്ദാരം

2.മിസ്. മരമുല്ല

3. മിസ് നിഷാ ഗാന്ധി, സോറി നിശാഗന്ധി.

4. മിസ്. പൂച്ചപ്പഴം , ഈ ഫാഷന്‍ ഷോയില്‍ പങ്കെടുക്കുന്ന രണ്ടു പഴങ്ങളില്‍ ആദ്യത്തേത് .

മിസ് ചീനക്കാരി പട്ടം മോഹിച്ചെത്തിയവര്‍
1. മിസ് മഞ്ഞ മന്ദാരം

2. മിസ് ജമന്തി

3. മിസ് പാവല്‍

ഇനി റാമ്പില്‍ എത്തുന്നത്
മിസ് കായാമ്പൂ.
നീല നിറത്തില്‍ മറ്റു സ്ഥാന ആര്‍ത്തികള്‍ ഇല്ലാതെയിരുന്നതിനാല്‍ വാക്കോവര്‍ ലഭിച്ചു

ഇനി മള്‍ട്ടി കളര്‍ ഷോ.

1. മിസ് പനിനീര്‍ ചാമ്പ

2. റെഡ് ക്രൂസിഫിക്സ് ഓര്‍ക്കിഡ്

3. മിസ് കമ്മല്പ്പൂവ്

4. മിസ് തൊണ്ടിപ്പഴം . പഴം വര്‍ഗ്ഗത്തലെ രണ്ടാം പാര്‍ട്ടിസിപ്പന്റ്

5. അവസാനത്തെ കണ്ടസ്റ്റന്റ് മിസ് ചെമ്പരത്തി

(ആരോ ഒരു ബ്ലോഗര്‍ ഈയിടെ വീട്ടുമുറ്റത്തെ ചെടികളുടെ ഫോട്ടോ ഇട്ടിരുന്നു. ആരാണെന്നു മറന്നു, എന്നാലും അതില്‍ നിന്ന് പ്രചോദനം കൊണ്ട ഈ പോസ്റ്റ് ആ പുള്ളിക്കാരനു തന്നെ സമര്‍പ്പിച്ചു. )

അലങ്കാരപ്പാക്ക്

2008-07-13T03:15:00.000-07:00

അലങ്കാരപ്പാക്കുകള്‍ (പൂന്തോട്ടത്തില്‍ ഭംഗിക്കു വളര്‍ത്തുന്ന അടയ്ക്കാമരങ്ങള്‍ ) രണ്ടുമൂന്നു തരം ഉണ്ട്. ഇത് pinang merah (ശാസ്ത്രനാമം areca vestiaria ) . ഈ ഇന്തോനേഷ്യക്കാരി കുഞ്ഞ് അടയ്ക്കയുടെയും ചുവന്ന പാളയുടെയും ഭംഗികൊണ്ട് ലോകം മൊത്തമുള്ള ഉഷ്ണമേഘലാ തോട്ടങ്ങളില്‍ എത്തി.

(ഈ ഫോട്ടോ കുമരകത്തെ ക്യുസാറ്റ് കൃഷിഗവേഷണകേന്ദ്രത്തില്‍ നിന്നെടുത്തത്. ക്ലിക്ക് ചെയ്തു കഴിഞ്ഞപ്പോള്‍ സെക്യൂരി ഗാര്‍ഡ് വന്ന് "ഇവിടെ പടമൊന്നും എടുത്തുകൂടാ" എന്നു പറഞ്ഞ് എന്നെ ഓടിച്ചു)

അഗ്രിഗേറ്റര്‍ കാണിക്കാത്ത പോസ്റ്റ് കൂമന്‍പള്ളിയില്‍

http://koomanpalli.blogspot.com/2008/06/police-story-5.html

ആരെടാ വലിയവന്‍?

2008-06-29T03:14:00.000-07:00

രംഭയുമുര്‍‌വ്വശിയും നമിക്കും ശചിക്കോ
കണ്ടാല്‍ സൗന്ദര്യമേറുന്നത്
മമ പനയഞ്ചേരി നാരായണിക്കോ

എന്ന മട്ടില്‍ ഒരു ശ്ലോകമില്ലേ ഉമേഷ് ഗുരുക്കളേ?

( വിദ്യ ബ്ലോഗിലിട്ട രണ്ട് പോസ്റ്റുകള്‍

http://vidyaa.blogspot.com/2008/06/blog-post_28.html

&

http://vidyaa.blogspot.com/2008/06/blog-post.html

അഗ്രിഗേറ്ററില്‍ വരുന്നില്ലെന്ന് ബൂലോഗരെ അറിയിക്കാന്‍ ഇട്ട പോസ്റ്റ് ഇത് )

സമര്‍പ്പണം പനി പിടിച്ചു വയ്യാതെ ചുരുണ്ടുകൂടിയിരിക്കുന്ന കലേഷിന്‌

കേരള്‍സ്‌ ഡോട്ട്‌ കോമിനെതിരേ പ്രതിഷേധിക്കുന്നു

2008-06-08T13:52:00.000-07:00

ചുമ്മ ഫോട്ടം പിടിക്കണ ഒരു അണ്ണന്‍

2008-02-21T08:39:00.000-08:00

കൈപ്പള്ളി അണ്ണന്‍ വല്യേ ക്യാമറ കൊണ്ട് എന്നെ പിടിക്കാന്‍ വന്നു. ഞാന്‍ ചെറിയ ക്യാമറ കൊണ്ട് പുള്ളിയെ പിടിച്ചു.

ഭ്രാന്താശുപത്രിയുടെ ഇംഗ്ലീഷ്

2008-01-27T13:42:00.000-08:00

ഫോട്ടോ ഞാനെടുത്തതല്ല. ഇന്ത്യക്കാരനല്ലാത്ത ഒരാളിനോട് ശകലം ഈ-മെയില്‍ ഉണ്ടായപ്പോ ദേണ്ടെടാ നിങ്ങടെ നാട്ടിലെ ഡോക്റ്റന്റെ ബോധം എന്ന മട്ടില്‍ തമാശയ്ക്ക് അയച്ചതാ. നോക്കിയപ്പോ സ്ഥലം കേരളം.

ഈ അണ്ണനു മനശാസ്ത്രത്തി ഡീപ്ലോമയും പിച്ചഡിയും ഉണ്ടെന്ന് ബോര്‍ഡില്‍, ഇത്രേം ഉണ്ടായിട്ടും സൈക്കോ എന്നത് മാന്യമായ വിശേഷണമല്ലെന്നും ആക്ഷേപമാണെന്നും അറിയാത്തതോ അതോ ഭ്രാന്താശുപത്രി എന്നതിന്റെ പദാനുപദ തര്‍ജ്ജിമയാണോ എന്തരോ

ഹോമിയോ മനശ്ശാസ്ത്രഞ്ജനെന്നു ബോര്‍ഡ്, പക്ഷെ ബീ എച്ച് എം എസ്സ്, ഡിയെച്ചെമ്മെസ്സ് ഒന്നും ഉള്ളതായിട്ട് ബോര്‍ഡില്‍ കാണാനുല്ല. സൈക്കോകളേ, നിങ്ങളെ പടച്ചമ്പ്രാന്‍ തുണയ്ക്കട്ടെ.

[കേരളമല്ല സ്ഥലമെങ്കില്‍ എനിക്കു അതിശയമൊന്നും ഈ ബോര്‍ഡ് കണ്ടാലുണ്ടാവില്ലായിരുന്നുത്തിരുപതു വയസ്സുള്ളപ്പോ ഹൈദരാബാദിലൊരു ബാറില്‍ ഒറ്റയ്ക്കിരുന്നു പൊന്മാന്‍ കഷായം നുണയുകയായിരുന്നു ഒരുത്തന്‍ വടവി വന്നു.

ഐ സീ യൂ ആര്‍ എലോണ്‍ ആന്‍ഡ് സാഡ്.
ഞാന്‍ ചുമ്മ ചിരിച്ചു.
ഐ ഗസ്സ് യു ആര്‍ ഇന്‍ പ്രോബ്ലം. ഡോണ്ട് വറി, കണ്‍സള്‍ട്ട് മീ, ഐ വില്‍ സോള്‍വ് ദിസ്. എന്നും പറഞ്ഞ് വിസിറ്റ്ങ്ങ് കാര്‍ഡ് എടുത്തു നീട്ടി- ഡോക്റ്റര്‍ എസ് കേ ഗുപ്ത. ഇമ്പൊട്ടന്റ് സ്പെഷ്യലിസ്റ്റ്. എം ബി ബി എസ്സ്, എഫ് ആര്‍ സി എസ്സ്, കേ പി എസ് സി, കേ എസ് ആര്‍ ടി സി.

നിന്റെ അച്ചനാടാ അസുഖം എന്നു പറയാന്‍ ഓങ്ങിയ ഞാന്‍ ഇമ്പൊട്ടന്റ് സ്പെഷലിസ്റ്റിന്റെ കാര്‍ഡ് കണ്ട് ചിരിച്ചു കൂവിപ്പോയി. അത്രയും നേരം കുടിച്ച കിങ്ങ് ഫിഷര്‍ പാഴ്]

കലം ബിരിയാണി

2007-10-11T01:20:00.000-07:00

ബൂലോഗര്‍ക്കെല്ലാം ഈദുല്‍ ഫിത്തര്‍ ആശംസകള്‍.

ഇത് മല്ലപ്പള്ളിയിലെ മാതാ ഹോട്ടലിലെ കലം ബിരിയാണി. ഒരാള്‍ക്കുള്ള ബിരിയാണി വീതം ഓരോ മണ്‍ കുടത്തില്‍ അടച്ചു പാചകം ചെയ്ത്, കുടത്തോടെ വില്‍ക്കുന്ന രീതിയാണിതിന്റേത്.
ഈ ഫ്ലേവര്‍ ലോക്ക് സം‌വിധാനമാണ്‌ ഇതിന്റെ രുചിയുടെ പ്രത്യേകത എന്ന് ഹോട്ടലുകാര്‍ അവകാശപ്പെടുന്നു, മല്ലപ്പള്ളിക്കാര്‍ അംഗീകരിക്കുന്നു. വാങ്ങുന്നയാള്‍ക്ക് ഘടഭഞ്ജനം നടത്തിയോ കയ്യോ തവിയോ ഇട്ടു കോരിയോ കഴിക്കാം.

വാങ്ങി കൊണ്ടു പോകുന്നവര്‍ സൂക്ഷിക്കണം, കലത്തിനു ചൂടാണ്‌, പോളിത്തീന്‍ കീശയിലിട്ട് തൂക്കിപ്പിടിച്ചു നടന്നു പോയാല്‍ ബിരിയാണിയില്‍ മണ്ണു പറ്റും. ഓട്ടോയില്‍ നിന്നിറങ്ങിയ വഴി ഞാന്‍ പടിക്കല്‍ കൊണ്ട് കുടമുടയ്ക്കാന്‍ പോയി.

സംഭവത്തിനൊരു പ്രത്യേകരുചി ഒക്കെ ഉണ്ടെന്ന് ഞാനും സാക്ഷ്യപ്പെടുത്തുന്നു, പക്ഷേ ഹൈദരാബാദ് ബിരിയാണിയാണ്‌ ഏറ്റവും ഇഷ്ടം എന്ന എന്റെ അഭിപ്രായം മാറ്റാന്‍ ഈ കലധാരിക്കും കഴിഞ്ഞില്ല.

എക്സ്പീരിയന്‍സിനു ട്യൂഷന്‍ വേണോ?

2007-08-16T13:35:00.001-07:00

കഴിവോ കുടുംബത്തു കാശോ ഉണ്ടേല്‍ ആര്‍ക്കും ബിരുദവും അതിന്റെ അനന്തിരവുമൊക്കെ എടുക്കാം. പക്ഷേ അതുകഴിഞ്ഞ് ജോലി അന്വേഷിച്ചിറങ്ങുമ്പോളാണു പുലിവാല്‌. എക്സ്പീരിയന്‍സ് വേണം. എല്ലാവരും ഇങ്ങനെ എക്സ്പീര്യന്‍സ് ഉള്ളവരെ മാത്രം എടുത്താല്‍ നമ്മളെന്തു ചെയ്യും? എക്സ്പീരിയന്‍സ് എവിടെ നിന്നും കിട്ടും? സോപ്പുകമ്പനിക്കാര്‍ പറയുമ്പോലെ വിഷമിക്കേണ്ടാ, അതെല്ലാം മറന്നേക്കൂ.

ഇതാ ഒരു എക്സ്പീരിയന്‍സ് ടീച്ചര്‍. ഒന്നാം ക്ലാസ്സു മുതല്‍ പത്താം ക്ലാസ്സുവരെയുള്ള കുട്ടികളെ എക്സ്പീരിയന്‍സ് പഠിപ്പിക്കുന്ന ഏക ടീച്ചര്‍. പത്തുക്ലാസ്സ് പഠിച്ചിറങ്ങുമ്പോള്‍ പത്തുവര്‍ഷം എക്സ്പീരിയന്‍സുമായി.
(ആ അവൈലബിള്‍ "ബൈയും" ടീച്ചര്‍ "ഫ്രം" ഗ്രേഡ് 1 റ്റു ഗ്രേഡ് 10 ഉം വിട്ടേക്കൂ ഈ ടീച്ചര്‍ നിങ്ങളെ റെന്‍ ആന്‍ഡ് മാര്‍ട്ടിന്‍ ഹൈസ്കൂള്‍ ഗ്രാമര്‍ പഠിപ്പിക്കുന്നൊന്നുമില്ലല്ലോ. എക്സ്പീരിയന്‍സ് അല്ലേ പഠിപ്പിക്കുന്നത്)

ഭാര്യാ ഭര്‍തൃ ജോലി ഒഴിച്ച് ബാക്കി സകലതിനും എക്സ്പീരിയന്‍സ് വേണം . ഇന്നു തന്നെ വിളിക്കൂ, എക്സ്പീരിയന്‍സ് നേടൂ.

ഫോറസ്റ്റുമഴ

2007-06-30T00:48:00.000-07:00

നാട്ടില്‍ നിന്നൊരു മഴ കൊണ്ടു വരാന്‍ അംബി പറഞ്ഞിരുന്നു. ദാണ്ടേ കുമരകം മഴ. തുമ്പിക്കൈ വ്യാസമുള്ള മഴത്തുള്ളി. രാത്രിയോളം ഇരുണ്ട ലൈറ്റ് അപ്പ്. വെള്ളച്ചാട്ടത്തിന്റെ സൗണ്ട് എഫക്റ്റ്. മായമയം- അതായത് മയയോട് മയ!

പത്തല്ല പതിനായിരമല്ല

2007-06-07T13:27:00.000-07:00

എണ്ണാമെങ്കില്‍ എണ്ണിക്കോ, നാളെ കള്ളം പറയരുതേ!

മക്കളേ, മടങ്ങി വരൂ

2007-06-01T12:05:00.000-07:00

മക്കളേ, “ ഞാന്‍ തിരിച്ചു വരുമ്പോള്‍ ബുക്കേതെങ്കിലും കണ്ടില്ലെങ്കില്‍- അതിന്റെ പേരില്‍ ചൊല്ല് ഉണ്ടാവില്ല, തല്ലും ഉണ്ടാവില്ല, പക്ഷേ കൊല്ല് ഉണ്ടാവും“ എന്നു പറഞ്ഞിട്ടാണ് നിങ്ങളുടെ അമ്മ നാട്ടില്‍ പോയത്. ( എനിക്കെതിരേ പ്രയോഗിക്കപ്പെട്ടത് ഞാന്‍ കോപ്പിറൈറ്റ് എടുത്ത പ്രയോഗം... ഹും)

എന്നിട്ടും ഞാന്‍ നിങ്ങളില്‍ ചിലരെ കറങ്ങാന്‍ പുറത്തു വിട്ടിട്ടുണ്ട്(അച്ഛന്മാര്‍ പൊതുവേ സ്വാതന്ത്ര്യം കൂടുതല്‍ തരുന്നവരാ, സ്നേഹം കൂടുതല്‍ ഇങ്ങോട്ട് പോരട്ട്, ഒരു സോപ്പ്). അമ്മ തിരിച്ചു വരാറായി, അതുകൊണ്ട് ഇന്നേയ്ക്ക് ഏഴു നാളുകള്‍ക്കകം കറങ്ങാന്‍ പുറത്തു പോയിരിക്കുന്നവര്‍ എല്ലാം തിരിച്ചെത്തിക്കൊള്ളണം.

പോകുമ്പോള്‍ എയര്‍പോര്‍ട്ടില്‍ വച്ച് നിങ്ങടമ്മ “ഞാന്‍ ഒരു വാള് അവിടെ വച്ചിട്ടുണ്ട്, ഓര്‍ത്തോ” എന്നു പറഞ്ഞത് , ഗര്‍ഭിണികള്‍ സാധാരണ വാളുവയ്ക്കാറുണ്ട്, അതിനിപ്പോ പറയാനെന്താ എന്നേ കരുതിയുള്ളു. ഇതാണ് സംഭവം എന്ന് വീട്ടിലെത്തിയപ്പോഴാ അറിഞ്ഞത് . അച്ഛനെ കൊല്ലിച്ചവന്‍ എന്ന ചീത്തപ്പേരു കേള്‍പ്പിക്കാതെ വേഗം വരീന്‍. ഇന്‍ ഹൌസ് ഉണ്ണിയാര്‍ച്ചക്ക് തല്‍ക്കാലം ഇവിടെ വേക്കന്‍സി ഇല്ല.

അച്ഛന്‍ പുകവലിക്കരുതെന്നോ കള്ളു കുടിക്കരുതെന്നോ ചിന്ന വീട് വയ്ക്കരുതെന്നോ എന്തിനു ബ്ലോഗില്‍ കയറി വളിച്ച പോസ്റ്റുകള്‍ ഇടരുതെന്നു പോലും അമ്മ പറഞ്ഞിട്ടില്ല. ആകെ ആവശ്യപ്പെട്ടത് നിങ്ങളെ കളയരുതെന്നു മാത്രമാണ്. കാരണവും അറിയാമല്ലോ, മുപ്പതു വര്‍ഷം (ഇല്ല ആദ്യത്തെ അഞ്ച് മൈനസ്)കിത്താബു വാങ്ങിയിട്ടും ഒരെണ്ണം പോലും അതില്‍ എന്റെ കയ്യില്‍ ഇന്നില്ലാത്തതുകൊണ്ടാണ്. പുറത്തു കറങ്ങുന്നവര്‍ എത്രയും വേഗം വരൂ.

(ഫോട്ടോ രേഷ്മ ഇടാന്‍ പറഞ്ഞതുകൊണ്ട് അവര്‍ക്കു തന്നെ സമര്‍പ്പിച്ചു. എന്റെ ടെലി ഫോട്ടോ ലെന്‍സും ക്യാനണ്‍ റെബലും സ്വപ്നത്തിലും, സോണി സൈബര്‍ഷോട്ട് നാട്ടിലും ആയി പോയതുകൊണ്ട് ഹാന്‍ഡിക്യാമിന്റെ സ്റ്റില്‍ മെമ്മറിയില്‍ എടുത്തതാണ്. ക്വാളിറ്റി ബഹുത്ത് മോശം ഹേ)

ഇത്തിരിവെട്ടത്തിന് ഇത്തിരി മധുരം

2007-05-29T11:24:00.000-07:00

ഇത്തിരിവെട്ടത്തിനു പിറന്നാള്‍ ആശംസകള്‍.

പച്ചാനയ്ക്കും പെരിങ്ങോടനും പട്ടേരിക്കും കലേഷിനും...

2007-05-11T00:03:00.000-07:00

ഇന്നു പച്ചാനയുടെയും പെരിങ്ങോടന്റെയും പട്ടേരിയുടെയും ജന്മദിനം. മൂവര്‍ക്കും ആശംസകള്‍! ശശിയേട്ടനു‍(കൈതമുള്ള്)വൈകിയ പിറന്നാളാശംസകള്‍, പൂച്ചക്കുട്ടിക്ക് അഡ്വാന്‍സ് ആശംസകള്‍.

കലേഷിനും റീമക്കും ഒന്നാം വിവാഹവാര്‍ഷികാശംസകള്‍!

തുളസി

2007-05-07T14:06:00.000-07:00

തുളസി എന്നു ആലോചിക്കുമ്പോള്‍ ആര്‍ട്ടിസ്റ്റ് ടി. കലാധരനെ പോലെ താടിയുള്ള ഒരു സഞ്ചിമൃഗമായിരുന്നു മനസ്സില്‍ അതുകൊണ്ട് തുളസിയെ നേരിട്ടു കണ്ടപ്പോ ഡിസില്യൂഷനായി. മൂന്നു ദിവസം ഉറക്കമൊഴിച്ചശേഷമുള്ള യാത്രയിലാണു തുളസിയെക്കണ്ടത്. ഒന്നും അങ്ങനെ ചോദിച്ചുമില്ല, പറഞ്ഞുമില്ല. എന്തരോ ആട്ട്, ദാ ലതാണു തുളസി

കരീം മാഷിനും സുല്ലിനും തറവാടിക്കും

2007-05-01T10:36:00.000-07:00

കരീം മാഷിനും സുല്ലിനും തറവാടിക്കും പിറന്നാള്‍ ആശംസകള്‍!
നല്ല നാഗര്‍കോവില്‍ നാടാര്‍ സദ്യ ഒരുക്കിയിട്ടുണ്ട്‌, ഇന്ന് ഇവിടായിക്കോട്ടെ ഭക്ഷണം.

[ചിത്രം ഞാനെടുത്തതല്ല, പ്രസിദ്ധീകരണാവകാശം മാത്രമേ എനിക്കുള്ളു]

അധോലോകത്തില്‍ നിന്നും പുറത്തേക്കു വന്നവര്‍

2007-04-21T05:09:00.000-07:00

ഇവിടെല്ലാരും വിളവെടുപ്പു നടത്തുന്നു, ഞാന്‍ പങ്കെടുത്തില്ലെന്നു വേണ്ട . ദാണ്ടെ അഞ്ചാറു ചേന, കാച്ചില്‍, നനകിഴങ്ങ്.

കലേഷിന് ആശംസകള്‍

2007-04-12T23:56:00.000-07:00

ഇന്ന് നമ്മുടെയെല്ലാം സ്വന്തം കലേഷ്‌ കുമാറിന്റെ ജന്മദിനം. മൂപ്പര്‍ വെയിറ്റ്‌ കുറയ്ക്കല്‍ യജ്ഞത്തിലായതിനാല്‍ ഇവിടെ പായസം ഇല്ല, പകരം ദേവന്‍ സ്പെഷ്യല്‍‍ ഫ്രൂട്ട്‌ മാര്‍വല്‍ ഒരു കോപ്പ.

ഇനിയും ഒരു സെഞ്ച്വറിക്കാലം ആര്‍മ്മാദിച്ച്‌ വാഴുക കലേഷേ.

അതുല്യക്കാശംസകള്‍

2007-03-24T07:35:00.000-07:00

ഇതെന്താ ഈ ഫോട്ടോയില്‍ എന്ന് ആലോചിക്കുകയാണോ? പിറന്നാളുകാരി അതുല്യക്ക്‌ എറ്റവും ഇഷ്ടമുള്ള കാര്യങ്ങള്‍ - ശര്‍ക്കര, നെയ്യ്‌, പാല്‌, തേങ്ങാ, കശുവണ്ടി ഒക്കെ ചേരുന്ന ഒരു പലഹാരം- അലുവാ.

വരൂ കുട്ടികളേ, കട്ട്‌!
(ഞാന്‍ താഴേന്ന് ഒരു ചാമ്പക്കാ കഴിച്ചോളാം, നെയ്യും മധുരോം എനിക്കു പിടിക്കൂല്ലാ)

അഗ്രജന്

2007-03-24T04:17:00.000-07:00

അഗ്രജന്റെ പിറന്നാള്‍ ഇന്നാണെന്ന് അറിഞ്ഞില്ല. അതുകൊണ്ട് ഒന്നും വാങ്ങാന്‍ പറ്റിയില്ല. അതു നന്നായി, നല്ലോരു ദിവസമായിട്ട് ലഡുവും ജിലേബിയും കഴിച്ച് വയര്‍ ചീത്തയാക്കണ്ടാ. ഇത് പനിനീര്‍ ചാമ്പക്കായ. ആ ദുര്‍ഗ്ഗേടെ കല്യാണത്തിനു പോയിട്ട് വരുന്ന വഴി ഒരു വീട്ടില്‍ കയറി ഒപ്പിച്ചതാണ്.

ലോ ഒരു ലോഗോ

2007-03-16T17:11:00.000-07:00

പണ്ടൊരു കമ്പനിയുടെ ലോഗോ വ്യാഖ്യാനിച്ച് ഒരു വെള്ളായി രണ്ടു മണിക്കൂര്‍ സംസാരിച്ചു കേട്ടപ്പോഴാ എന്റെ ലോഗാസ്വാദനം ലോഗോത്തര നിലവാരം പുലര്‍ത്തുന്നില്ലെന്നത് മനസ്സിലായത്. അതേല്‍ പിന്നെ മനസ്സിലാവാത്ത കൊടിമുദ്രകള്‍ കണ്ടാല്‍ ആരോടെങ്കിലും ചോദിച്ച് പുരിയവയ്ക്കും.
ബ്ലോഗന്മാരോടൊപ്പം കൊച്ചി തെണ്ടാനിറങ്ങിയപ്പോള്‍ കണ്ടതാണിത്‌. എന്താ ഉദ്ദേശിച്ചതെന്ന് മനസ്സിലായില്ല.

പുല്ലില്‍ ഗോള്‍ഫ്‌ ക്ലബ്ബുകൊണ്ട്‌ തട്ടിയാല്‍ പാമ്പ്‌ ചാടി വരുമെന്നോ?

നെയ്യപ്പം തിന്നാല്‍ രണ്ടുണ്ടു കാര്യം എന്നു പറഞ്ഞതുപോലെ കോലുകൊണ്ട്‌ പന്തും തട്ടാം പാമ്പിനേം തല്ലിക്കൊല്ലാം എന്നോ?

അപ്രത്തെ ബാറില്‍ നിന്നും അടിച്ചു പാമ്പായി ഗോള്‍ഫ്‌ കളിക്കാന്‍ വരുന്നവരുടെ ക്ലബ്ബാണിതെന്നോ?

ആരെങ്കിലും പറഞ്ഞു താ. നിങ്ങളെ ലോഗന്‍ സായ്പ്പ്‌ അനുഗ്രഹിക്കും.

ഇക്കാസിനാശംസകള്‍!

2007-03-12T13:40:00.000-07:00

ഇന്ന് ഇക്കാസിന്റെ പിറന്നാള്‍. എത്രവയസ്സായെന്നു പറഞത് മറന്നു അമ്പത്തേഴെന്നോ അതോ അറുപത്തി രണ്ടെന്നോ? ആ എത്രയെങ്കിലും ആകട്ടെ, സെഞ്ച്വറി അടിച്ചേച്ച് പോകട്ടെ, എന്ന് ആശംശിക്കുന്നു.

കറിയപ്പാ

2007-03-08T23:07:00.000-08:00

കൃഷിന്റെ ചോറിനു ഏറ്റവും യോജിച്ച കറി തേങ്ങ വറുത്തരച്ച കോഴി ആണെന്ന് മലേഷ്യന്‍ ആദിവാസികള്‍ പറയുന്നു. ജെന്റിങ് ഹൈലന്‍ഡ്സില്‍ പോകുന്ന വഴിയാണ് കാട്ടുമുക്കില്‍ ഈ ആദിവാസി തട്ടുകട കണ്ടത്. പണ്ടുകാലങളില്‍ വേട്ടക്കു പോയിരുന്നവര്‍ ഈ കുറ്റി ആവനാഴി കണക്കെ മുതുകില്‍ തൂക്കിയാണ് പോയിരുന്നതെന്നും ആ. വാ. പറഞ്ഞു തന്നു. ഇതേന്ന് ഒരു കുറ്റി ചോറും ചിക്കന്റെ ചാ‍റും കഴിച്ചിട്ട് വയര്‍ കോണ്‍ക്രീറ്റ് തിന്ന പോലെ നിറഞ്ഞു. രണ്ടു ദിവസം വിശന്നതേയില്ല.

ആട്ടിന്‍ ചാട്ടം

2007-02-03T01:32:00.000-08:00

ദേ ദേവനങ്കിള്‍ ഹാജര്‍ സോലീറ്റമോളേ. ഹാപ്പി ബെര്‍ത്ത്ഡേ റ്റു യൂ.

മോള്‍ക്കിഷ്ടമുള്ള ഒരു കാര്യം കൊണ്ടു വന്നിട്ടുണ്ട്‌. അന്ന് ചിക്കാഗോ സൂവില്‍ വച്ച്‌ പറഞ്ഞില്ലേ ആടിനെ ഇഷ്ടമാണെന്ന്.
(ആട്ടികുട്ടി ചാടിയപ്പോ ടെന്‍ഷനോവിഷനില്‍ എടുത്ത പടമാ ബൂലോഗരേ, ഒന്നും സെറ്റ്‌ ചെയ്തില്ല, ഗുണനിലവാരമില്ലായ്മ ക്ഷമിക്കണേ)

കായാമ്പൂ

2007-02-01T23:57:00.000-08:00

കായാമ്പൂ വേലിയില്‍ വിടരും
കമലദളം കുളത്തില്‍ വിരിയും
അനുരാഗവതീ നിന്‍ തൊടികളിലിന്നാലിപ്പഴം പൊഴിയും
(നടക്കുന്ന കാര്യങ്ങളല്ലേ പാടാവൂ? )

അതുല്യ

2007-01-08T12:30:00.000-08:00

രണ്ടാഴ്ച്ച മുന്നേ കടലോരത്തുകൂടി മോട്ടോര്‍സൈക്കിളോടിച്ചു പോകുന്ന ദമ്പതികളെ നോക്കി ഒരാള്‍ ഇങ്ങനെ കമന്റ്‌ പാസ്സാക്കി
"blessed couple are happy usually & happier when they are together"

ആ ബൈക്കര്‍മാര്‍ അതുല്യയും ശര്‍മ്മാജിയും. ഇവരെ രണ്ടുപേരായി കാണുക ബുദ്ധിമുട്ട്‌.

ബൂലോഗത്ത്‌ ഞാന്‍ കാലെടുത്തു കുത്തി അഞ്ചു മിനുട്ടിനുള്ളില്‍ അതുല്യയുമായി ശണ്ഠ കൂടി. ഇപ്പോഴും വലിയ കുറവൊന്നുമില്ല തമ്മില്‍ തല്ലിന്‌, അതൊരു ആശയപരമായ സംഘട്ടണമാണെന്നും അതില്‍ ഇരു വ്യക്തികളേയും സംബന്ധിച്ചൊന്നുമില്ലെന്നും എനിക്കറിയാം, അവര്‍ക്കും അറിയാമെന്ന് തോന്നുന്നു.
ബ്ലോഗിനോട്‌ വികാരപരമായ ഒരു സമീപനം തീരെയില്ല അതുല്യക്ക്‌. "ബ്ലോഗ്‌ എന്റെ അമ്മാവിയപ്പന്‍ ആണോ അതിനെക്കുറിച്ച്‌ ഇങ്ങനെ ആകുലപ്പെടാന്‍" എന്ന് അവരുടെ തന്നെ നിരീക്ഷണം!

പൊതുവില്‍ സോദ്ദേശ സാഹിത്യമാണ്‌ അതുല്യയുടെ ഇതുവരെ എഴുതപ്പെട്ട പത്തു നാല്‍പ്പത്‌ കഥകളും- അതായത്‌ ഒരു സന്ദേശം ബൂലോഗത്തേക്കയക്കുന്നതിന്റെ മീഡിയമായി കഥകള്‍ തിരഞ്ഞെടുക്കുന്നെന്നേയുള്ളു അവര്‍. അതിലോരോന്ന് പരീക്ഷിച്ച്‌ പുലിവാല്‍ പിടിക്കുകയും ചെയ്തിട്ടുണ്ട്‌.

പട്ടാള ജീവിതമാണോ പട്ടാളക്കാരനുമൊത്തുള്ള ജീവിതമാണോ കാരണമെന്നറിയില്ല അതുല്യക്ക്‌ പലപ്പോഴും കര്‍ക്കശമായ എഴുത്തും സംസാരവും വന്നും പോയും ഇരിക്കുന്നത്‌ കാണാം.

ഭയങ്കരമായ പ്രതിസന്ധികളുടെ ബാല്യം തരണം ചെയ്ത ആളെന്ന നിലക്കും കേരളത്തിന്റെ രാഷ്ട്രീയ- ജനകീയ രംഗങ്ങളില്‍ നിന്നും പൊതുവേ വിദേശ മലയാളികള്‍ ഒഴിഞ്ഞു മാറുമ്പോള്‍ അവിടെ സജീവമായി രംഗത്തു തുടരുന്നയാളെന്ന നിലക്കും അതുല്യയോട് എനിക്കൊരു മതിപ്പു തോന്നിയിട്ടുണ്ട് .

നല്ല പാതി ശര്‍മ്മാജി ഞാന്‍ ജോലി ചെയ്യുന്ന സ്ഥാപനത്തില്‍ (നേരില്‍ കാണുമെന്ന അവസ്ഥ വരും വരെ ഇവര്‍ എന്നോട്‌ പറഞ്ഞില്ല!) തന്നെ വൈമാനിക സൌദാമിനീ ശാസ്ത്ര വിദഗ്ദ്ധനായി (വക്കാരിയെ ഒതുക്കി) ജോലി നോക്കുന്നു. മൂപ്പരെക്കുറിച്ച്‌ എഴുതുമ്പോള്‍ മലയാളം എഴുതുന്നത്‌ മാറി നിന്ന് അടക്കം പറയുന്നതുപോലെയല്ലേ? ശകലം ആംഗലേയം മൊഴിയാം
Sarmaji is an engineer in the aviation electronics section of the organization I serve. Though working in entirely different functional avenues, I know him pretty well (let him keep guessing about my spy-net!) and knowing how his peer level staff and seniors assess him, I wasn’t surprised to hear he was honoured with our best engineer’s award.

എകമകന്‍ അര്‍ജ്ജുന്‍ പത്തില്‍ പഠിക്കുന്നു.

വീഡിയോക്കോണര്‍

2007-01-06T04:41:00.000-08:00

കുറേക്കാലമായി ഒരു എസ്‌ എല്‍ ആര്‍ ക്യാമറ വാങ്ങണോ അതോ ഒരു ഹാന്‍ഡിക്യാം വാങ്ങണോ എന്നാലോചിക്കാന്‍ തുടങ്ങീട്ട്‌. വല്ല ലോട്ടറിയും അടിച്ചാല്‍ രണ്ടും കൂടെ വാങ്ങാം എന്നും മനോരാജ്യവും മംഗളവും കണ്ടു. ഒടുക്കം ഇന്ന് അടിച്ചു. ലോട്ടറിയല്ല, ഡെസ്പ്‌.

ആ അരിശത്തില്‍ തൂമ്പയെടുത്തും ചേമ്പു കിളച്ചും തുവരകള്‍ വഴുതിന വാഴകള്‍ വച്ചും നമ്പൂരാരുടെ പിറകെ നടന്നും ഇമ്മിണി ഉണ്ടായിരുന്നത്‌ (കട. Mr. Nambiar) മൊത്തമായി കടയില്‍ പൊട്ടിച്ച്‌ ഞാന്‍ ഒരു വീഡിയോക്ക്‌ ഓണറായി.
ഇത്‌ ആ വീഡിയോക്യാമറയില്‍ ആദ്യമായി എടുത്ത്‌ പടം.

ഇത്‌ ആ വീഡിയോ ക്യാമറയെ ആദ്യമായി പടത്തിലാക്കിയത്‌.

എല്ലാം ബൂലോഗനെഞ്ചത്തിരിക്കട്ട്‌.

സിദ്ധാര്‍ത്ഥന്‍

2006-12-30T14:36:00.000-08:00

സിദ്ധാര്‍ത്ഥനെ ബൂലോഗയുഗത്തിനും മുന്നേ മലയാളവേദി ഫോറമെഴുത്തുകാലത്ത്‌ ഞാന്‍ പരിചയപ്പെട്ടു. എങ്കിലും ഏറെക്കാലം കഴിഞ്ഞാണ്‌ എന്റെ അയല്‍വാസിയാണെന്ന് മനസ്സിലായത്‌.

ഫോറത്തില്‍ ആക്റ്റീവ്‌ ആയിരുന്ന സിദ്ധാര്‍ത്ഥന്‍ എങ്ങനെയോ മടിയനായ ബൂലോഗവാസിയായി. നിലപാട്‌, ചിത്രങ്ങള്‍ എന്നീ ബ്ലോഗ്ഗുകളില്‍ വളരെക്കുറച്ച്‌ പോസ്റ്റുകളേ കാണാനുള്ളു. വായനക്കിടയില്‍ എന്ന ബ്ലോഗ്‌ മാത്രമാണ്‌ ഇടക്കെങ്കിലും അനങ്ങുന്നത്‌.

അനാലിറ്റിക്കല്‍ റിവ്യൂ ചെയ്യാനുള്ള അസാമാന്യ കെല്‍പ്പാണ് സിദ്ധന്റെ സിദ്ധിയായി എനിക്കു തോന്നിയിട്ടുള്ളത്‌. തകര്‍പ്പന്‍ സാഹിത്യ നിരൂപണങ്ങളെഴുതാനുള്ള കഴിവു കൈവശമുണ്ട്‌. പറഞ്ഞിട്ടെന്തു കാര്യം, എഴുതണ്ടേ.

അദ്ധ്യാപകന്‍ എന്ന നിലയിലും സിഡ്‌ തിളങ്ങും എന്നെന്റെ അനുമാനം. ബാലസാഹിത്യം എഴുതാനും കൊള്ളാവുന്ന ഒരാള്‍.

പുതിയ സ്വപ്നമായ ശബ്ദതാരാവലി ഓണ്‍ലൈനിന്റെ പണിപ്പുരയിലാണിപ്പോള്‍ ഈ ബ്ലോഗന്‍. ആ പ്രോജക്റ്റില്‍ എനിക്ക്‌ ആകര്‍ഷകമായി തോന്നുന്നത്‌ ഈ ലെക്സിക്കണെ ഒരു തെസാറസ്‌ ആയി വര്‍ത്തിക്കാന്‍ പ്രാപ്തമാക്കിയാല്‍ മുഖ്യധാരാ സാഹിത്യകാരന്മാരും മാധ്യമ പ്രവര്‍ത്തകരും ഉപയോഗിക്കായ്കയാല്‍ മലയാളത്തില്‍ ഇന്നു സര്‍ക്കുലേഷനില്‍ നിന്നും പുറത്തുപോയ പതിനായിരക്കണക്കിനു വാക്കുകള്‍ ഇന്റര്‍നെറ്റിലൂടെ പുനര്‍ജനിക്കാനുള്ള സാദ്ധ്യതയാണ്‌.

സിദ്ധാര്‍ത്ഥനെന്ന സജിത്ത്‌ യൂസഫ്‌ ഷാര്‍ജ്ജയില്‍ ജോലി ചെയ്യുന്നു. താമസം അല്‍ ഖിസൈസ്‌ അല്‍ ദുബായി അല്‍ ജന്നത്ത്‌ ഉള്‍ ഫിര്‍ദൌസില്‍. വിവാഹിതന്‍. കുട്ടികള്‍- ആദ്യത്തെയാള്‍ സ്റ്റോര്‍ക്കിന്റെ ചുണ്ടിലെ തുണിത്തൊട്ടിലില്‍ ഉറങ്ങിക്കൊണ്ട്‌ യാത്ര തിരിച്ചിട്ടുണ്ട്‌.

കൈപ്പള്ളി

2006-12-28T16:38:00.000-08:00

[ബ്ലോഗിനെക്കുറിച്ചല്ല, ബ്ലോഗന്മാരെക്കുറിച്ച്‌ ഒരു സീരിയല്‍ എഴുതാനുള്ള ശ്രമത്തിലാണ്‌. മിക്കവാറും ഞാന്‍ ഇഷ്ടമ്പോലെ വാങ്ങിക്കൂട്ടും! എന്തരോ വരട്ട്‌ ആദ്യത്തെ ഭാഗം ഞാന്‍ ദാ പബ്ലിഷി. ]

നിഷാദ്‌ ഹുസൈന്‍ ലബ്ബ കൈപ്പള്ളി എന്ന ബ്ലോഗറെ വളരെ കുറച്ചു കാലം മാത്രമേ ആയുള്ളു ഞാന്‍ പരിചയപ്പെട്ടിട്ട്‌. വളരെക്കുറച്ചു മാത്രമേ പരിചയപ്പെട്ടുള്ളു എന്നും പറയാം.

കൈപ്പള്ളി എന്ന ഭാഷാസ്നേഹിയെ പെട്ടെന്നു മനസ്സിലാവും. കൈപ്പള്ളി എന്ന ഫൊട്ടോഗ്രാഫറെ അതിലും എളുപ്പം മനസ്സിലാവും. അഞ്ചു മിനുട്ട്‌ ഇടപഴകിയാല്‍ റാസല്‍ ഖോറിലെ ഫ്ലാമിംഗോക്കുഞ്ഞുങ്ങള്‍ "എന്റെ സ്വന്തം മക്കളാ"ണെന്നു പറയുന്ന പക്ഷിസംരക്ഷകനെയും കണ്ടെത്താം.

നിഷാദെന്ന ബിസിനസ്സുകാരനെയും ഗൃഹനാഥനെയും എനിക്കു തീരെ പരിചയമില്ല.

തിരുവനന്തപുരം ആക്സന്റില്‍ (സോറി സ്വരാഘാതം, വക്കാരി വെട്ടല്ലേ, പ്ലീസ്‌)കൊല്ലം ഭാഷ മിക്സ്‌ ചെയ്ത സംസാരം കേട്ടാല്‍ നാട്ടിലൊരാല്‍ത്തറയിലോ ആര്‍ട്ട്സ്‌ ക്ലബ്ബിലോ സായാഹ്നങ്ങള്‍ ചിലവിട്ടില്ലെന്ന് തോന്നുകയേയില്ല. എന്നാല്‍ നമ്മള്‍ അംഗീകരിച്ച അല്ലെങ്കില്‍ ആലോചിക്കേണ്ടതുണ്ടെന്നു കരുതാത്ത പലതിലും കൈപ്പള്ളിക്കു കല്ലുകടിക്കുമ്പോല്‍ മറിച്ചും തോന്നും.
മനസ്സിലാക്കാന്‍ അല്ലെങ്കില്‍ അംഗീകരിക്കാന്‍ പ്രയാസം കൈപ്പള്ളിയെന്ന റെബലിനെയാണ്‌. compare, contrast, append, revise എന്ന രീതിയില്‍ കാര്യങ്ങളെ കാണുന്ന എനിക്ക്‌ കൈപ്പള്ളിയുടെ റിബല്‍ സമീപനങ്ങളിലും നിരീക്ഷണങ്ങളിലും നല്ലൊരു ശതമാനം വിയോജിപ്പാണ്‌. എന്നാല്‍ "കേരള ചരിത്രമെഴുതിയവര്‍ അപ്പടി തെറ്റു പറഞ്ഞിരിക്കുന്നു. വിശ്വാസം പോരാഞ്ഞു ഞാന്‍ UCLA ലൈബ്രറി സൂക്ഷിച്ചിരിക്കുന്ന പുരാതന കപ്പല്‍ ലോഗുകള്‍ പരിശോധിച്ചു ഇന്നത്‌ കണ്ടെത്തി" എന്നു പറയുന്ന കൈപ്പള്ളിയിലെ "ഫയങ്കര നാച്ചുറല്‍" റെബലിനെ അംഗീകരിക്കാതിരിക്കാനാവില്ല.

രത്നച്ചുരുക്കം: കൈപ്പള്ളി ഒരു "ഭയങ്കര" ഉരുപ്പടി തന്നപ്പോ.

ആശംസകള്‍

2006-12-23T12:30:00.000-08:00

2007 ഈ ഭീമന്‍ ഒന്നാം സ്ഥാനത്ത്‌ തുടരുന്ന അവസാനവര്‍ഷം. ഒരു വര്‍ഷം കൂടി കഴിയുന്നതോടെ Burj Dubai ഒന്നാം സ്ഥാനത്തെത്തുന്നു. ഓരോ വര്‍ഷവും മുന്നത്തേതിനെക്കാള്‍ കൂടുതല്‍ മെച്ചപ്പെട്ടതും കൂടുതല്‍ നല്ലതും കൂടുതല്‍ ആനന്ദകരവും കൂടുതല്‍ നന്മ നിറഞ്ഞതും ആകട്ടെ ലോകം.

നാളെ വിദ്യയുടെ പിറന്നാള്‍. പിറന്നാളുകാരിയേയും കൊണ്ട്‌ രാത്രി ദുബായി സെന്റ്‌ മേരീസില്‍ പോയി പിറന്നാളുകാരനെ സന്ദര്‍ശിക്കുന്ന പതിവുണ്ടായിരുന്നു. ഇത്തവണ ഞങ്ങള്‍ രണ്ടും രണ്ടിടത്തായതുകൊണ്ട്‌ പോകാന്‍ തോന്നുന്നില്ല. ഇവിടെയിരുന്ന് എല്ലാവര്‍ക്കും വേണ്ടി പ്രാര്‍ത്ഥിക്കാം. നല്ലതുവരട്ടെ.

ബൂലോഗര്‍ക്കെല്ലാം ക്രിസ്ത്മസ്‌, ഈദ്‌, നവവത്സരാശംസകള്‍!

ദില്‍ബന്‍+മടിപ്പുറം

2006-11-27T13:52:00.000-08:00

ഇഞ്ചിപ്പെണ്ണ്‌ ഏവൂരാന്റെ ബ്ലോഗില്‍ ഇട്ട കമന്റ് കണ്ടപ്പോഴാ ഓര്‍ത്തത് ഈ പടത്തിന്റെ കാര്യം. ലാപ്ടോപ്പ് ഇല്ലാത്ത ബ്ലോഗന്റെ പടവും ഓടക്കുഴല്‍ ഇല്ലാത്ത കൃഷ്ണന്റെ പടവും കിട്ടാന്‍ വല്യേ പാടാ.
[ഐഷൂ റായിയെ ആരു പടം എടുത്താലും അത് കലക്കും എന്നു പറഞ്ഞപോലാ ദില്‍ബന്റെ കാര്യം. ഞാന്‍ കലക്കി!]

ബുജി

2006-11-01T04:28:00.000-08:00

എന്നെ ബുജിയെന്നു വിളിച്ച പരാജിതനു ശിക്ഷയായി ഇതിരിക്കട്ട്‌.
ഒരു ദിവസം വളര്‍ച്ചയേ താടിമീശക്കുള്ളു. ബാക്കിയെല്ലാം ആത്മാര്‍ത്ഥമായി ശ്രമിച്ചിട്ടുണ്ട്‌.
(പടത്തേല്‍ ക്ലിക്കിയാല്‍ ഇതിലും വലുതായി പേടിക്കാം)

ദീപാവലി- ഈദ്‌ ആശംസകള്‍

2006-10-22T11:07:00.000-07:00

എല്ലാ ബൂലോഗര്‍ക്കും വീട്ടുകാര്‍ക്കും സ്നേഹം നിറഞ്ഞ ദീപാവലി- ഈദ്‌ ആശംസകള്‍.

ആഴിക്കങ്ങേക്കരയുണ്ടോ...

2006-10-20T03:56:00.000-07:00

ഏലയ്യാ കുത്തനെ തൂക്കനെ ഏലേലമ്മാ
ഏലയ്യാ നെടുമല കൊടുമല ഏലേലമ്മ.
ആഴിക്കങ്ങേക്കരയുണ്ടോ യാമങ്ങള്‍ക്കൊരു മുടിവുണ്ടോ
അടങ്ങാത്തിരമാല വഴിയേ ചെന്നാലീയല്ലിനു തീരമുണ്ടോ..

എട്ടു പത്തു വയസ്സുള്ളപ്പോല്‍ കണ്ട രംഗമായിരുന്നു അത്‌.ഈയിടെ ദുബായി അബ്രയില്‍ ഈ ഉരു പോകുന്നതു കണ്ടപ്പോള്‍ അതില്‍ ചതിയില്‍ പെട്ട്‌ അടിമയായ പ്രഭു ചാട്ടവാറടിയേറ്റ്‌ തണ്ടു വലിക്കുന്നുണ്ടെന്ന് തോന്നിപ്പോയി. (പടയോട്ടമെന്ന സിനിമ ഒരുമാതിരി നാടകമാണ്‌, കൌണ്ട്‌ ഓഫ്‌ മോണ്ടിക്രിസ്റ്റോ അടിച്ചു മാറ്റി പ്രിയദര്‍ശനെഴുതിയ കഥയാണ്‌ എന്നൊക്കെ ഇന്നറിയാം,പക്ഷേ അന്നത്തെ അതേ പത്തുവയസ്സുകാരനായി ആ രംഗങ്ങള്‍ ഓര്‍ക്കാന്‍ ഒരു ബുദ്ധിമുട്ടുമില്ല ഇന്നും)

ഈ ഉരുവിന്റെ പടം കുമാറിനാണു സമര്‍പ്പിച്ചു. (എന്തിനാണെന്നു പറയുന്നില്ല!)

മധുലോലുപന്‍

2006-10-08T13:15:00.000-07:00

എനിക്കു ഫോട്ടോഗ്രഫി വശമില്ല.
ഇവന്‍ ആരെന്നും എനിക്കറിയില്ല.
എന്റെ പൂച്ചമരത്തില്‍ ഇവന്‍ മധുതേടിയെത്തി.
ഞാന്‍ പകര്‍ത്തി.
ശലഭങ്ങളുടെ സ്നേഹിതന്‍ വിഷ്ണു പ്രസാദിനു സമര്‍പ്പിക്കുന്നു.

ഡാലിക്കൊരു കമന്റിടാന്‍

2006-09-26T08:31:00.000-07:00

ഡാലിക്കൊരു കമന്റിടാന്‍ കുറച്ചു ഗ്രന്ഥങ്ങള്‍ എടുത്ത് അരച്ചു കലക്കി വച്ചു. ഇനി ഇതെടുത്തു കുടിച്ചു വേണം എഴുത്തു തുടങ്ങാന്‍!

ബിരിയാണിക്കുട്ടിക്ക്‌ ആശംസകള്‍!

2006-09-09T08:41:00.000-07:00

‍വക്കാരിയെപ്പോലെ
സാമ്പാറും കിച്ചടീം ഉണ്ടാക്കാന്‍ നേരം കിട്ടിയില്ല ബിരിയാണി.. ആകെ ഉള്ളത്‌ ച്ചിരേം കടുമാങ്ങായും ഇഞ്ചിക്കറിയുമാ. ന്നാലും.. ഉള്ളത്‌ തൂക്കു കിണ്ണത്തിലാക്കി ഞാനും എത്തി.. ആശംസകള്‍

മുല്ലപ്പൂവിന്റെ കുഞ്ഞുവാവക്ക്‌

2006-06-29T14:17:00.000-07:00

പിറന്നാള്‍ ആശംസകള്‍

ക്രൌഞ്ചം ശ്രുതിയിലുണര്‍ത്തും നിസ്വനം

2006-06-26T22:56:00.000-07:00

ഇപ്പോസ്റ്റ്‌ ബൂലോഗഗുരുക്കള്‍ ഉമേഷിന്‌ സമര്‍പ്പിതം.പടത്തില്‍ ക്രൌഞ്ചമായി അഭിനയിക്കുന്നത്‌ കുഞ്ഞിക്കുറുമി.

മുല്ലപ്പൂവേ

2006-06-21T15:35:00.000-07:00

മുല്ലപ്പൂവേ
എന്നോടാദ്യമായിട്ടാ ഒരാളു വണ്ടി വേണമെന്ന് പറഞ്ഞത്‌. എന്റെ കയ്യിലുള്ളതില്‍ വച്ച്‌ ഏറ്റവും നല്ല വണ്ടി ഇതാ മുല്ലപ്പൂവ്‌ പിടിച്ചോ.
(പിറകിലെ ഗ്രീപ്പന്‍ വണ്ടി എടുക്കരുതേ നമ്മുടെയല്ല. സ്വീഡന്‍ കാരോട്‌ കച്ചോടവും ശരിയാവില്ല. ബോഫോഴ്സ്‌ ഓര്‍മ്മയുണ്ടല്ലോ? ഇപ്പോഴും തീര്‍ന്നിട്ടില്ല)

അളവുതൂക്കം:
4300 സി സി വീ 8 എഞ്ജിന്‍
8500 ആര്‍ പി എം
483 ബി എച്ച്‌ പി ശക്തി
6 എഫ്‌ 1 ഗീയര്‍
ഇലക്ട്രില്‍ പേര്‍സണലൈസബിള്‍ ലെതര്‍ ഉള്‍വശം
സ്പീഡ്‌: മണിക്കൂറില്‍ 306 കിലോമീറ്റര്‍ (190 മൈല്‍)
പേര്‌ - ഫെറാറി 430
ഊര്‌- ഇംഗ്ലണ്ട്‌

വിശാലന്‌ അഭിനന്ദനങ്ങള്‍

2006-06-21T11:44:00.000-07:00

ഭാഷാഇന്ത്യയുടെ അവാര്‍ഡ്‌ ജേതാവ്‌ ബ്ലോഗരത്നം വിശാലന്‌ ഒരായിരം അഭിനന്ദനങ്ങള്‍!
(ആയിരം പൂ ഒരു ഷോട്ടില്‍ കിട്ടണേല്‍ വല്ല കുരുക്കുത്തിമുല്ലയുമേ പറ്റൂ എന്നതിനാല്‍ ഉള്ളതിന്റെ പരമാവധി പൂക്കള്‍ സെലെക്റ്റ്‌ ചെയ്തപ്പാ)

പ്രവചനാചാര്യര്‍ വിശ്വം മാഷിനും അഭിവാദ്യങ്ങള്‍ . പൂക്കള്‍ പകുതി ആ അക്കൌണ്ടിലും..

ശ്രീജിത്തിന്‌ പിറന്നാള്‍ ആശംസകള്‍

2006-06-20T00:08:00.000-07:00

പിറന്നാളായിട്ട്‌ ബ്രേക്ഫാസ്റ്റിനു ദ്രവിച്ച കോഴീം ചപ്പാത്തീം അടിച്ചോ? ഇന്നിനി ലോ ഫാറ്റ്‌ സദ്യ മതി. ദേ ഇതേല്‍ ഒരു സാംബാറും ഫാറ്റ്‌ ഫ്രീ തൈരു കൊണ്ട്‌ ഒരു മോരു കറീം. അടുത്ത പിറന്നാളിന്‌ പ്രോപ്പര്‍ സദ്യ ആകാം.

ബിരിയാണിവാഹകന്‍

2006-06-16T23:24:00.000-07:00

ദേ ഇവന്‍ (പടത്തില്‍ ക്ലിക്കിയാല്‍ വലിയ വ്യൂ വരും) ബിരിയാണിക്കുട്ടിയുടെ ഇരുമ്പു കുതിര, ഹാര്‍ലി.

ആയിരത്തി തൊള്ളായിരത്തി മൂന്നില്‍ വിറ്റു തുടങ്ങിയ ഹാര്‍ലി ഡേവിഡ്‌സണ്‍ ഇന്നും ലോകം പ്രിയത്തോടെ നോക്കുന്ന മൊബൈക്ക്‌ ആയി തുടരുന്നു.

ചിത്രത്തില്‍ കാണിച്ചിരിക്കുന്ന 2006 മോഡല്‍ റോഡ്‌ കിംഗ്‌ (എഫ്‌ എല്‍ എച്ച്‌ ഐ) ദീര്‍ഖ ദൂര വിനോദ സഞ്ചാരി വിഭാഗത്തില്‍ പെടുന്നു
1450 CC ട്വിന്‍ എയര്‍ കൂള്‍ഡ്‌ എഞ്ജിന്‍
16 ഇഞ്ച്‌ ചക്കരം ചക്കരം
5 ഗീയര്‍
അഡ്ജസ്റ്റബില്‍ സസ്പെന്‍ഷന്‍
എഴടി നീളം
രണ്ടരയടി സീറ്റ്‌ പൊക്കം
65000 ദിര്‍ഹം (എട്ടുലക്ഷം രൂപായോളം) അതായത്‌ ഒരു നിസ്സാന്‍ മാക്സിമയുടെ വില

എനിക്കും ഇതോടിക്കാന്‍ ആഗ്രഹം ഉണ്ട്‌. എന്തരേലും ചില്ലറ കൊടുത്താല്‍ വാടകക്ക്‌ കിട്ടുകയും ചെയ്യും പക്ഷേ ഈ പഹയന്റെ മോളില്‍ ഇരിക്കാനുള്ള സൈസ്‌ വല്ല ആര്‍ണോള്‍ഡ്‌ ശിവശങ്കരനും അവന്റെ കിങ്കരനും മാത്രമേ കാണുകയുള്ളപ്പാ. നമ്മള്‍ ഇരുന്നാല്‍ വേലിപ്പുറത്ത്‌ ഓന്ത്‌ കയറി ഇരിക്കുമ്പോലെ, ചേമ്പിന്‍ താളില്‍ മരമാക്രി ഇരിക്കുമ്പോലെ ..വര്‍ണ്ണിക്കാന്‍ വാക്കുകല്‍ കിട്ടുന്നില്ല സുഹൃത്തുക്കള്‍..

എല്‍ ജിക്ക് - നാലു കെട്ടും തോണിയും

2006-06-14T15:23:00.000-07:00

എല്‍ജിക്ക്‌ സമര്‍പ്പിക്കുന്നു ഈ പോസ്റ്റ്‌.

ചിത്രത്തില്‍ കാണുന്നത്‌ വെറും നാലു കെട്ട്‌ അല്ല, പത്തിരുപത്തഞ്ച്‌ കെട്ടുള്ള ചെക്ക്‌ മേറ്റ്‌ ബാര്‍. സുനാമി അടിച്ചപ്പോള്‍ നാലു കെട്ട്‌ ഒഴിച്ച്‌ ബാക്കിയെല്ലാം പൊട്ടിപ്പോയി പാവം മദ്യശാലയുടെ.

തോണി പക്ഷേ കാര്‍ ബ്രോക്കര്‍മാര്‍ പറയും പോലെ ഇന്‍ വീ ജീ സി.

ജബെല്‍ ഹഫീത്ത്‌

2006-05-30T01:34:00.000-07:00

അലൈനിലെ സുന്ദരിയായ ഈ മലയുടെ താഴ്വാരം സമീഹയുടെ ബ്ലോഗിലുണ്ട്‌ . ആ താഴ്വാരത്തില്‍ നിന്നും ഈ മലയിലേക്കുള്ള ഡ്രൈവ്‌ അതീവരസകരമാണ്‌ (പപ്പുവിന്റെ താമരശ്ശേരിച്ചുരത്തിന്റെയും ചിന്നാര്‍-ആളിയാര്‍ മലമ്പാതയുടെം അത്രയും ഇല്ലെങ്കിലും രസം തന്നെ)

ഇളമോള്‍ക്ക് പിറന്നാള്‍ ആശംസകള്‍!

2006-05-26T00:44:00.000-07:00

പൃഥുകം

2006-05-19T13:11:00.000-07:00

സന്തോഷിന്‌ ജന്മദിനാശംസകള്‍!
സ്നേഹിതന്‌ (ആ പേരുള്ള ബ്ലോഗറെയല്ല, "പൊതുവേ") സ്നേഹത്തോടെ കൊടുക്കാന്‍ "അവിലുമാം പഴവുമാം അവിയലുമാം.." എന്നല്ലേ വാര്യരേട്ട പറഞ്ഞിരിക്കുന്നത്‌ . ഈ അവില്‍പ്പൊതി ഞങ്ങള്‍ സ്നേഹം കൂടുമ്പോ അമ്മയെന്നും പിണങ്ങുമ്പോ പൊട്ടക്കണ്ണിയെന്നും വിളിക്കുന്ന, എന്റെ അയല്‍ക്കാരിയായ മഹിഷാസുരമര്‍ദ്ദിനിയുടെ പ്രസാദം..
സന്തോഷവും സമാധാനവും അനുദിനം വര്‍ദ്ധിക്കട്ടെ..

ഓ ടോ
ഓ ടോ ഇല്ലാതെ പോസ്റ്റാന്‍ വയ്യെന്നായി ഈയിടെ. വഞ്ചിപ്പാട്ടും പാടി ഈ പോസ്റ്റ്‌ അടിക്കുമ്പോള്‍ വിദ്യ പറയുന്നു അവിലു മാം , മലരു മാം, പഴം മാം എന്നൊക്കെ കേള്‍ക്കുമ്പോള്‍ സ്കൂളില്‍ കുട്ടികള്‍ " എന്റെ ഹാപ്പി ബെര്‍ത്ത്‌ ഡേ ഇന്നാണു മാം, ഇതാ കേക്ക്‌ മാം, സ്വീറ്റ്സ്‌ മാം, മുട്ടായി മാം" എന്നൊക്കെ പറയുന്നതുപോലെ തോന്നുന്നെന്ന്

അമ്മുവിന്

2006-05-12T02:10:00.001-07:00

അമ്മുവിനു പിറന്നാള്‍ സമ്മാനം.

ബൊക്ക

2006-05-10T12:38:00.000-07:00

ഈര്‍ക്കിലി ഫ്രെയിമില്‍ ബന്ദിയും ജമന്തിയും കരിമന്തിയും കൂട്ടിക്കെട്ടിയ ഒരു "ബൊക്ക" തരണമെന്നുണ്ടായിരുന്നു. അതില്ലാത്തതുകൊണ്ട്‌ തല്‍ക്കാലം സാദാ "ബൊക്കേ" കൊണ്ട്‌ തൃപ്തിപ്പെടൂ യുവ മിഥുന്‍ ചക്രവര്‍ത്തിമാാരേ.

സലിലിനൊരു മന്ദാരം

2006-05-05T00:17:00.001-07:00

മന്ദാരം തേടിയലയുന്ന സലിലിന്‌
(ഒരു ചൊവ്വും ചേലുമില്ലെന്നറിയാം. മന്ദാരം വേറേയില്ല കയ്യില്‍)

കണ്ണൂസാശ്രമം

2006-04-26T02:17:00.000-07:00

സംശയിക്കണ്ടാ, കണ്വാശ്രമം എന്നെഴുതിയപ്പോ തെറ്റിപ്പോയതല്ല കണ്ണൂസും കൂട്ടുകാരും വെടിപറഞ്ഞിരിക്കുന്ന ആല്‍മരത്തെ ആനയും അമ്പാരിയും മുന്നില്‍ നിര്‍ത്തി എടുത്ത പടമിത്‌. പടത്തിന്റെ ഓണര്‍ തന്റെ വീടിനെ ഫ്രെയിമില്‍ നിന്നും നീക്കരുതെന്ന് പ്രത്യേകം നിര്‍ദ്ദേശിചതനുസരിച്ച്‌ "അനാശ്യാസ കുസുമം" തന്നെ ഇടുന്നു - അനാശാസ്യത്തിനു ക്രെഡിറ്റ്‌ ഗൌതമന്‍ സാറിന്‌

വിഷുദിനാശംസകള്‍!

2006-04-12T05:57:00.001-07:00

വക്കാരീ സങ്കടപ്പെടല്ലേ. എന്നാലാവുന്ന സംഭാവന ഞാന്‍ ഇതാ തരുന്നു.. ഇതങ്ങോട്ട് നൂഡിത്സില്‍ ഒഴിച്ച് പപ്പടം കുഴച്ച്...

അരവിന്നന്‍ കുട്ടിക്ക്

2006-04-08T10:10:00.000-07:00

മ്മളേം ഒരു ഫ്യാമിലി ചിത്രം ഇട്ടു അരവിന്നങ്കുട്ടിക്ക് ഡെഡിക്കേഷന്‍

ഇളം തെന്നലിന്

2006-04-07T03:25:00.000-07:00

വിഷുവായില്ലല്ലോ, എന്നാലും ആരിഫ്‌ ചോദിച്ചതുകൊണ്ട്‌ കൊന്നപ്പൂ കുറച്ചെണ്ണം മലേഷ്യയില്‍ നിന്നിറക്കുമതി ചെയ്തു (കൊന്നപ്പൂവുണ്ടോ എന്നു ഇന്നു കൂമന്‍പള്ളിയില്‍ വിളിച്ചു ചോദിച്ചപ്പോ കൊന്ന മാത്രമല്ല ഒരു കാട്ടുചെമ്പകവും നിറയെ പൂത്തു നില്‍ക്കുന്നെന്ന് .. പടമെടുക്കാനൊരു വഴീമില്ലാ)

ആര്‍ക്കെങ്കിലും ഗ്രീറ്റിങ്ങ്സ്‌ കാര്‍ഡ്‌ ഉണ്ടാക്കാന്‍ ഉപകരിക്കട്ടേ എന്നു കരുതി ഉണ്ണിക്കണ്ണന്റെ കുന്നിക്കുരു ഉരുളിയില്‍ പൊന്നും പണവും ഇട്ടു ഒരു പടം കൂടി എടുത്തു ഇപ്പോള്‍.. ഈ വിഷുവിനു കുട്ടികള്‍ക്കേ കൈനീട്ടമുള്ളൂ എന്നു വച്ചിരുന്നതാ തെന്നലു ബാലകൃഷ്ണപിള്ളേം ഇനി കുട്ടിയായി കൂട്ടാം

വക്കാരീ, ഇഞ്ഞോട്ട്‌ വരീ.

2006-04-04T21:58:00.000-07:00

ഉദയസൂര്യന്റെ നാട്ടില്‍ സക്കൂറാ,സക്കൂറാ
എന്നു വിളിക്ച്ചു കൂക്കി നടക്കുന്ന കീറക്കൂറ പിള്ളേരുടെ നടുവില്‍ വക്കാരിയും ഇരുന്നു ബീറു വീശുന്നത്രേ.

ചങ്ങായി, ഇതു ഇന്ത്യന്‍ സക്കൂറാ- ശീമക്കൊന്ന എന്നു പറയും വേലിക്കലൊക്കെ വയ്ക്കുന്ന കാട്ടു ചെടിയാ. ഇതിന്റെ മൂട്ടില്‍ പാത്തിരുന്നു വാറ്റു വീശുന്ന ഒരു ചടങ്ങു നമ്മുടെ നാട്ടിലും ഉണ്ട്‌. കൂടുന്നോ വാറ്റ്‌69 അടിക്കാന്‍? ഹൈലി ഇന്‍ഫ്ലേമബ്ലില്‍ പോട്ടബില്‍ വാട്ടീസുമായി നമുക്കീ ശീമക്കൊന്നയുടെ മൂട്ടില്‍ കൂടാം.. വാ വക്കാരീ